徐子珊堅持只做黃金檔期劇集的女主角，都不肯俾面高層拍處境劇，最終改由冇 say的黃翠如頂硬上。
探熱針
捱義氣 徐子珊唔肯降 grade 黃翠如執三攤拍新版《愛•回家》
收視持續插水的《愛•回家》，已鐵定拍到 804集七月六日正式摺埋，大台原本篤定香香（岑麗香）接力孭正，點知香香原來早已被戲劇組其他監製徵用，女角懸空，製作部總監於是急 call徐子珊幫拖；但做慣黃金檔女主角，徐子珊認為拍處境劇形同降格，一口拒絕。無計可施下，唯有起用余詠珊愛將黃翠如。
黃翠如加張繼聰，叫座力有限，為保錢途，大台決定換血不換藥，接棒新劇，繼續沿用《愛•回家》吊命。
廣告部詐晒型
一度是收視保證的《愛•回家》，由全盛時期的二十七點最高收視，跌至十七點，風光不再！為了吸納年輕觀眾層，大台原本安排岑麗香夥拍張繼聰，加埋一班奀到爆新人接棒，陣容卻因太弱，令外出𢱑生意的廣告 sales要以石頭換血，得個吉。
「啲 sales詐晒型，話班客嫌 class太奀，就算長期客戶，都話等套劇出咗街睇定啲再算，另外有部分肯落（廣告）嘅，亦俾唔到價！」一名大台人說。
見勢色不對，大台高層唯有叫停再另謀對策，拖吓拖吓，岑麗香夠鐘要為梁材遠新劇《為食神探》埋位，製作部總監曾勵珍於是轉向，打一線位置的徐子珊主意。明明做開黃金檔花旦，徐子珊打死唔願紆尊降貴，寧願得罪高層，落閘一口拒絕。
冇得推
「佢（徐子珊）八點半、九點半黃金檔女主角，調去拍處境劇變相係 down grade，仲會少咗機會出騷搵快錢，最慘係大有可能俾記者寫衰，我係徐子珊都 say no」劇組工作人員說。
肯聽話捱義氣，又算有觀眾緣的數埋冇幾個，製作部再唔情願，最後亦唯有徵用綜藝科總監余詠珊愛將黃翠如。
公司叫到，加上未夠秤 say no，黃翠如最終硬食，執三攤同張繼聰在新版《愛•回家》中，合演情侶。
炮灰
早前《愛•回家》舉行「變新」交棒活動，席上曾勵珍表示：「《愛•回家》三年內做咗七百幾集，已經變成一個品牌，七月六日開始，會以新嘅家庭故事延續落去。」
據了解，焗上艇的黃翠如同張繼聰因為叫座力一般，大台為求保住廣告額，唯有繼續沿用《愛•回家》劇名，生死未卜，孭正的黃翠如和張繼聰，隨時變成炮灰。
|
鍾意就快D Share啦！
|
|
|