Bobby不獲TVB續約曾勵珍插手留福將
無綫近年不斷出現藝員逃亡潮，不少小生花旦約滿後不再續約，寧願北上搵真銀。正當鬧「演員荒」之際，近日驚傳無綫「福將」歐陽震華（Bobby）竟不獲無綫續約，Bobby亦坦認獲藝員部回覆「有啱先搵你」。有傳事件令無綫管理層大為震驚和緊張，下令派出戲劇製作總監曾勵珍親自出面與Bobby接洽傾談續約，Bobby無奈謂：「感慨良多，當傾吓閒偈囉。」
無綫藝人近年出現青黃不接的情況，不少小生花旦約滿後均不再續約，逃亡潮一直出現。繼親生仔林峯離巢轉投英皇娛樂向外發展後，馬德鐘亦已離開無綫，只偶爾以「散打」方式為無綫効力。而一直盛傳當紅的小生與花旦吳卓羲、黃宗澤、胡杏兒和徐子珊等約滿後均不再續約，向外發展另闢天地。正當無綫嚴重缺人之際，近日坊間驚傳無綫藝員部將放棄「福將」歐陽震華（Bobby），斷絕多年大家一貫的「一年一部」部頭合約的關係，決定不再與他續約。歐陽震華「被放棄」傳聞愈傳愈盛，無綫管理層得知事件後大為震驚，緊急派出戲劇製作總監曾勵珍出面，聯絡歐陽震華方面再傾談續約問題，下旨重新為他訂造一份合約，再度身訂造劇本給歐陽震華演出，才令傳聞得以「降溫」。
一年一劇未求加薪
本報昨日透過電話訪問Bobby有關被無綫「放棄」不獲續約之傳聞，他直認不諱說：「係，係有件咁嘅事。其實同無綫一年一部嘅合作關係維持咗好多年，大家都合作得好開心。早排拍攝劇集《東坡家事》後，經理人都有同無綫保持聯絡傾談續約細節，但傾到最後一次時經理人得到個答覆係『有啱先搵你』，令我哋意會到係不獲續約。」Bobby表示其實對續約沒有提出過甚麼特別要求，仍是一年一部，也沒加酬勞，一切都只是想跟無綫維持良好關係，怎料竟獲得這個回覆，令他感到相當愕然。
Bobby坦言與無綫續約與否對他來說其實不太重要：「其實一年先拍到一部，有時返內地拍劇，都要心掛掛幾時要返香港還劇債，所以之前自己都有諗過係咪要停一停呢個關係呢？而最終大家都維持咗咁多年，其實都係想保持呢段良好合作關係啫。點知今次有咁嘅回覆，自己都係想得個明白，有個交代咁啫。」
大半年搵六年人工
歐陽震華由81年訓練班開始，至今與無綫合作了三十多年，他說：「其實當年拍完《壹號皇庭Ⅱ》後，我係『自然流失』過大半年，咁我咪去馬來西亞發展囉，離開無綫大半年就搵咗喺無綫5、6年嘅人工！」他表示離開無綫不夠一年，便又被徵召回巢開拍《壹Ⅲ》。問到有傳曾勵珍出面傾續約，他說：「咪當傾吓閒偈囉！如果離開無綫都會唔捨得o架，感慨良多，但始終都要面對。」
一直以來，Bobby有份參與的劇集均是收視保證，故被冠以「福將」之稱。最新一部無綫古裝喜劇《東坡家事》亦是起用他擔正大旗，夥拍萬綺雯、陳煒和黃心穎一同演出，該劇拍攝過程愉快，與Bobby合作個個開心。
文：影視組
|
鍾意就快D Share啦！
|
|
|