孖老公鬥前妻 葉翠翠爭繼女撫養權 [忽然1周 - 1043] 翠翠,葉翠翠,MW,

新婚拖到實

新婚 5日，葉翠翠冇得同老公仔度蜜月，卻要現身法庭，二人全程十指緊扣互相支持。

滾熱辣

孖老公鬥前妻　葉翠翠爭繼女撫養權

葉翠翠與建築師公司副董事 Raymond（周曉東）剛新婚不足一星期，老公前妻 Grace卻於月初入稟要求加生活費，由 9千 3加至 2萬 9，令翠翠兩公婆為打官司要延期度蜜月。

本刊收到消息， Raymond前妻入稟加生活費原因，是她現時與 11歲女兒同住，因此兩母女生活費龐大，前夫 Raymond理應負責。

老公前妻送上這份「結婚厚禮」，翠翠和 Raymond原來亦暗地裏部署還擊，據知二人待官司在 9月判決後，便會入稟爭 Raymond囡囡的撫養權，實行一家三口過新生活。

其他影片：>>翠翠晒恩愛　抗老公前妻
>>葉翠翠絕地反擊

本月 11日，葉翠翠正式加入人妻行列，但老公的前妻 Grace卻在二人大日子前夕，以「削減生活費，棄見親生女」為題，向傳媒廣發告密信，更附上 Raymond的個人資料及家事法庭檔案編號，鬧上法庭之餘，亦同時令新婚的葉翠翠冇面。

前妻單拖現身

上周四（ 16日），葉翠翠老公 Raymond的前妻 Grace Lam單拖現身法庭，就贍養費問題出席聆訊。聆訊結束後便乘的士到天后返工，據知她現時在一間紅酒貿易公司任職。

庭外愛的宣言

聆訊結束後，葉翠翠對現場記者開腔說：「旅行幾時去都得，只希望盡快搞掂件事。但我哋會握住對方隻手，一齊面對。」甜到漏。

返新工冇通知

據知 Raymond與前妻 09年離婚時，法庭已判決男方每月支付 8千 5予前妻，數月後男方私下加碼至 9千 3，雙方一直相安無事。但自去年 9月， Raymond被報道與葉翠翠拍拖後，曾任空姐的前妻亦因公司裁員致失業，遂要求 Raymond增加生活費 100%至 1萬 8千 6百元。當時二人口頭協議若然 Grace找到工作，生活費便要回復當初「舊價」。但據知女方早前找到新工後，並未有匯報。當 Raymond得悉後便自動調減給予對方的生活費，但前妻卻在葉翠翠與 Raymond大婚前再入稟要求增加生活費至 2萬 9，令二人婚後 5天要上庭，局住延期度蜜月。

老公驚記者

本月 11日，二人在四季擺酒，翠翠谷胸加入人妻行列， Raymond緊張到「硬晒軚」，當時翠翠說：「佢見到咁多閃光燈好驚。」

癡纏啜爆

葉翠翠與 Raymond愛得癡纏，二人不時拍拖外遊，更在微博晒恩愛。據知完了官司後，兩公婆會去歐遊補度蜜月。

100萬補償

離婚夫妻講錢失感情，但據知 Grace與 Raymond離婚前，已先後獲男方送贈 100萬現金和當時二人所住的私樓作補償。知情人士透露：「除咗現金同層樓，阿女每個月 1萬蚊學費同其他書簿雜費都係 Raymond直接交俾學校嘅！但 Grace每次要求加生活費，都話阿女有份住喺屋企，所以啲生活品全部要買兩份。」

留女在家中

據知，現時與 11歲女兒同住的 Grace，早前因工作關係認識現任老外廚師男友 Myers David，不時要飛外國探男友，因此女兒經常由外傭姐姐照顧。知情人續說：「其實 Raymond同 Grace啱啱離婚嗰陣， Grace仲好錫個女。咁 Raymond係男人要出外搵食，所以雙方都同意個女跟媽咪好啲。開頭佢兩個大人再見仍是朋友， Raymond幾時想見個女都得，佢哋有時仲會三個人出外食飯。但自從兩年前 Grace識咗個老外男友之後，就成日飛去外地陪男友，留低個女同外傭姐姐喺屋企。每次媽咪飛咗，個女就去爸爸屋企瞓。直至舊年 Grace睇到報紙知道 Raymond同葉翠翠拍拖，就限定個女只可以逢星期日見爹哋。有次阿女趁媽咪飛咗，靜靜雞去咗爹哋度，點知工人姐姐事後同 Grace講番， Grace就收起咗個女電話，仲鬧到佢喊㖭！

「有次仲誇張，嗰日係星期日！ Raymond因為要去機場接阿爸阿媽機， Raymond打俾 Grace話今日接唔到個女，點知 Grace就話：『我要返工呀！冇人睇住個女， Raymond驚阿女有事就飛車去接佢先。』去到先發現 Grace嗰日根本唔使返工，一直留喺屋企！」

葉翠翠見事態嚴重，與老公再三思量，二人決定爭回女兒。二人待 9月官司一過，便會正式入稟申請爭回女兒的撫養權。翠翠在電話中說：「我絕對支持老公，不過現階段一切交由律師處理，唔方便講。」

得奶奶歡心

周一（ 20日）晚，翠翠偕老公約埋自己爸爸和專程從上海來港探兒子的老爺、奶奶，到上環尚興吃飯，氣氛融洽，記者更聽到奶奶向新抱催生小朋友。

飽餐後，翠翠夫婦向老爺、奶奶慰問一輪，才各自上車離去，據知兩老現時已返回上海。

遺憾媽媽未陪嫁

與父母感情要好的翠翠，早前在婚禮上坦言遺憾母親因病去世未能陪嫁：「佢之前成日叫我如果結婚要早半年通知，等佢可以扮吓靚、整吓頭髮，可惜最後佢睇唔到。」

完整家庭較有利

早前有報道指周曉東前妻 Grace沒有通知前夫已找到新工，有刻意隱瞞狀況之嫌。對於會否因此影響雙方爭奪撫養權，謝偉俊律師在電話中說：「一般撫養權嚟講，小朋友嘅福利係最重要，如果誠信問題，只係普通講大話，影響不大，除非證明對方吸毒等等。而經濟條件對爭撫養權固然係其中一個考慮因素，但若果女方可以提供到俾仔女嘅生活，同離婚前唔大分別，咁就唔大影響。」

至於一邊係單親媽媽，另一邊係完整家庭，謝偉俊表示對爭撫養權亦有一定影響。「若證明新家庭可以給予溫暖俾小朋友，始終叫做多個人照顧。而單親家庭無論經濟上或照顧小朋友時間上都少咗，會係不利嘅因素。」

十指緊扣抗敵

暫住賽西湖

據知翠翠婚後與 Raymond暫住北角賽西湖寓所，待成功爭回女兒後，便會搬到鄰近較大面積的私樓過新生活。

上周四（ 16日），翠翠十指緊扣 Raymond現身灣仔家事法庭，以行動支持老公。聆訊後，她在記者面前更揚言：「呢個老公冇揀錯！」翠翠和老公雙劍合璧，至於 Raymond前妻 Grace當日則單拖現身法庭，事後往天后一貿易公司返新工，沿途沒有回答記者提問。

繼母做得好

葉翠翠與老公 Raymond的女兒相處融洽，其實得來不易。不過圈中也有不少好繼母，對「子女」視如己出。

林青霞

94年與富商邢李㷧結婚的「大美人」林青霞，婚後跟丈夫與前妻張天愛所生的女兒邢嘉倩同住，二人關係親密。邢嘉倩月前接受訪問亦對繼母有讚冇彈：「我同佢關係好好，好多嘢唔使講佢都明白，呢啲係緣份，亦代表佢對我父親嘅愛。」

范姜

范姜跟「阿 B」鍾鎮濤拍拖多年，早前結婚，她與老公跟章小蕙所生的囡囡嘉晴情同姊妹，經常孖住出街。范姜與阿 B補擺囍酒，嘉晴都現身祝福。

李玟

11年李玟與已育有兩女的 Bruce Rockowitz結婚，婚後她協助老公照顧兩女。早前李玟老爺過世，她才坦言有意生小朋友：「以前覺得 Bruce有兩個乖女已經足夠，但依家又好想生個男仔，到時為佢改老爺個名。」

鍾意就快D Share啦！

下一篇 》