當佢係朋友 科大毒男機械扣殺 [FACE - 424 - 大專校園] 科大,MF,

左起：張毅 John 21歲　電子及計算機工程系 Yr.2、金度勛 Do Hoon 21歲　電子及計算機工程系 Yr.1、區竣銘 Kenneth 21歲　計算機科學及工程系 Yr.3

「火之龍」係科大傳統出去參加機械人大專賽嘅名，由 07年用到𠵱家，起源自科大正門俗稱「火雞」嘅象徵。

Main Camp

當佢係朋友　科大毒男機械扣殺

各位，留意番，決賽已進入白熱化階段，科大羽毛球隊只要拎多一分就可以淘汰教院，成為今年 2015大專「羽毛球爭霸戰」雙打冠軍！科大「火之龍」屏息凝神開出一記高球，對手教院「締造傳奇」奮力撲救亦難力挽狂瀾，最終以 5比 3勝出。恭喜科大隊奪冠兼成為「五連霸」。咦！等等，亞視……唔係，機械人嚟嘅喂！

火之龍真身

兩部「火之龍」各有特色，左邊嗰部就高波低波瓣瓣有，右邊就負責開波兼擊球。

其實呢個係全港大專機械人大賽嚟，今年主題係「羽毛球爭霸戰」啫。就讀科大計算機科學及工程系 Yr.3，冠軍「火之龍」隊長區竣銘(Kenneth)直言為今屆賽事籌備了接近一年：「我哋上年 8月已經開會，傾吓點樣砌 2部打到羽毛球嘅機械人出嚟，淨係構思加畫圖都用咗半年，到今年 1月先開工砌實物。」

砌足 40幾粒鐘

由於距離比賽(28/6)不足 5個月， Kenneth話嗰 5個月已經當咗工作室係第二個家：「基本上我哋一星期 7日都會返去打躉，試過臨比賽前要趕工，通頂砌機砌足 40幾粒鐘，又試過 2個月冇同女朋友去拍拖，好彩佢都體諒，到最尾砌完製成品出嚟，直頭覺得好似阿媽生完仔咁，好有滿足感。」

兩部「火之龍」無論郁動、開波、揮拍都係全人手操控，當然似足高達咁有駕駛員啦，張毅(John)同金度勛(Do Hoon)就係「火之龍」嘅操作手喇，佢哋為咗操熟佢，呢半年練習逾千次， John更笑言：「唔當『火之龍』係朋友都唔得啦，日日對足 10幾粒鐘，見佢仲多過見我阿媽，有時喺工作室小休仲攬住佢嚟瞓添呀！」

Kenneth嘅工作室係好典型的「亂中有序」擺法，立立亂得嚟連五金鋪切割器都有，千祈唔好睇少！

一有時間， John同 Do Hoon兩位操作手就會把握機會，喺科大每個角落搵同學練習對打。

就算 Kenneth冇嘢做，佢都會一星期 7日去足工作室打躉，盡責過返工。

「讀得科大都毒毒哋！」

「火之龍」唔係人形攬枕喎，會唔會俾同學仔覺得好毒？ John就理直氣壯咁話：「讀得科大都係毒毒哋㗎啦，講笑啫，自己讀嗰科好難喺社會上應用出嚟，難得有個平台發揮吓，將自己幻想嘅變成真實，我又唔覺得有幾毒喎！」

嚟緊科大仲可以代表香港出戰 8月喺印尼搞嘅亞太區機械人大賽，同樣主題都係「羽毛球爭霸戰」， John更加充滿信心：「中國隊一定係最強㗎喇，不過佢哋採用全自動操控，但臨場變動同判斷，電腦有時都會出錯，我哋始終相信電腦係鬥唔贏人腦嘅！有信心贏中國隊！」

搞工作坊

科大機械人學會砌機械人出嚟唔單只為興趣為比賽，仲會不時搞啲專讓中、小學生參與嘅工作坊，教佢哋砌機械人添！

5比 3勝

今年機械人大賽嘅「羽毛球爭霸戰」玩法其實同一般正常羽毛球雙打比賽相同，總之邊一方回唔返個波去對面就為之輸兼對方得 1分，首先拎到 5分就勝出，好考反應同臨場發揮！

乜主題都有

每年全港大專機械人大賽主題都跟足亞太區機械人大賽，方便香港區代表勝出後能為港在國際賽爭取佳績，而且主題花樣多多，每一年都唔同。除咗今年難度極高嘅羽毛球雙打對戰外，其實過往幾年嘅主題都夠晒創意，好似上年嘅「親子樂融融」咁，用機械人玩盡媽媽同仔女角色扮演，鬥快完成兒時遊戲設施搖搖板、盪鞦韆、梅花樁和攀登架等任務。 2012年主題「搶包山」更加係可觀性十足，平時喺長洲人手搶包山就睇得多，搵機械人搶真係夠晒新穎，唔知下年又會係咩主題呢？

公園遊戲

細個去公園玩得多爬得快是常識吧，但要你用個機械人去擒高擒低，唔係咁易㗎！

搶包山

機械人「搶包山」就唔使真係爬上個包山度搶嘅，旨在玩吓綽頭，純粹操控機械人，鬥快將啲道具平安包放喺指定區域啫。

鍾意就快D Share啦！

下一篇 》