負皮變正評 杜如風似阿嬸翻身：要畫出腸自嘲囉！ [FACE - 425] 杜如風,MF,

杜如風曾經俾觀眾鬧到飛起，今次再拍旅遊節目收斂咗好多，不過說話速度仍然太慢，所以佢接受訪問時亦挑戰咗急口令，記得下載 FACE Pop睇片喇！

爆 Like王

負皮變正評　杜如風似阿嬸翻身：要畫出腸自嘲囉！

年頭旅遊節目《流行首爾》令杜如風變得入屋，只因有人話佢係世界級港女，甚至人身攻擊話杜如風肥腫難分；最近杜如風唔去首爾改玩《東京攻略》再出擊，觀眾竟然幾乎一面倒讚好，杜如風都大翻身！

原來杜如風喺收費台同 nowTV做咗 8年旅遊節目，大癲大肺扮港女係一貫風格，免費台觀眾可能未接受到，所以佢話呢次幫大台拍《東京攻略》，監製就要求佢收歛啲，起碼唔准再話自己靚女囉！

F：《 FACE》　杜：杜如風

曾因講笑自稱靚女而俾觀眾鬧，杜如風今次惟有自嘲係阿嬸同阿婆，冇咁反感囉！電視畫面

F：上次咁多人鬧你又話你講嘢太慢，點解繼續拍《東京攻略》呢？

杜：監製話我未俾人鬧夠，哈哈！上次負評好犀利，今次好期待啲人有咩 comment呢，但係啲人讚，我都嚇親！開心起碼人哋接受咗我。上次《流行首爾》我話自己有幾多個手袋呀、幾多對鞋呀，諗番轉頭係幾反感嘅！因為有啲觀眾唔知我嗰 8年做咗嗰堆節目係玩到咁癲嘛！可能嚇親囉！我講嘢係慢嘅，今次已盡量講快啲，但有時狀態唔好就慢咗，你知我冇稿嘛，又要好笑咪彈啲字出嚟囉！

電視畫面

F：今次監製有冇吩咐你收斂啲？

杜：有，好笑嘅！因為之前我成日話自己靚女會俾狗吠，其實係自嘲嘅笑話，但啲人 get唔到，以為我讚自己靚！監製今次唔准我再話自己靚女，咁好啦我唔講，咪猛話自己 Auntie呀、阿嬸呀，阿婆跑得快，一定有古怪囉！要畫出腸嘅自嘲囉！不嬲我都係自嘲嘅，否則一個人點撐半個鐘呀？梗係要有啲幽默感。

每集都見到杜如風瘋狂濕平，有傳由家人找數，佢解釋：「我所有入息係存入阿媽度，佢幫我找卡數或者儲起。」有冇叫你買少啲？「佢直頭想叫我去死呀！哈哈哈！」電視畫面

F：聽講今次大台迫到你好趕？

杜：好趕好趕， 5月定案， 5月頭已同導演飛去日本搜集資料，去咗 8日，返嚟 6日內要借衫同預備行李，再飛去拍第一轉 12日，再返嚟一星期，要還衫又要趕稿又要工作，仲要再借衫，然後再飛日本拍兩個禮拜，返到嚟 3個星期就出街喇，仲要做後期。本身係話 7月拍， 11月出街，但因為有《四個小生去旅行》同其他旅遊節目，如果我排喺之後播，距離上次 1月《首爾》太耐喇，所以叫我攝呢個期。癲咗呀我，書又 deadline、後期又 deadline，我真係 dead囉！（有冇失眠？）直情失晒，失身添呀！

杜如風有幾年冇出書，今年書展會出《風行千履》，少講旅遊轉講心事，果然人係會變嘅！

F：你書展會出新書《風行千履》，同之前嘅書有乜唔同？

杜：《風行千履》講我有一千對鞋，哈哈！之前多講旅遊、時裝、美容，今次想真係出一本內心啲嘅書，有情嘅書，親情啦、友情啦、小動物嘅情啦、愛情啦，深入啲！之前寫嗰啲係邊皮嘢，呢次感性啲！有個 chapter講 Eason、媽媽（何超儀）、霆鋒、阿徐、阿南。（又南曾經同你傳緋聞！）根本係公認嘅一對啦，其實寫點解會同佢熟呀，點解做咗緋聞男友，其實我成日黐佢車坐，我住佢對面咋，所以 friend咗啫！

鍾意就快D Share啦！

下一篇 》