謝賢噚日喺《4個小生去旅行》記者會上怒摑死敵曾江，搞到曾江助聽器甩咗，仲殃及池魚，打到胡楓眼鏡飛脫，事件全城哄動﹗
謝賢事後「大方」表示歡迎曾江向佢追究，而謝賢女兒謝婷婷今日同Eric Kwok喺九龍灣宣傳新戲《有客到》，婷婷被追問此事，佢話有睇過老竇打曾江條片，但未有時間了解。
有人質疑「4個小生」今次係為節目宣傳，問婷婷覺唔覺得？婷婷表示：「我又唔覺得爸爸會咁樣，不過我唔知。」問到會否建議老竇，向曾江道歉say sorry？婷婷就話：「要了解成件事先，未見過老竇對住記者朋友面前咁樣，非常唔似佢。」
婷婷表示佢前晚先返：「返到嚟拍廣告，當時有30幾人喺度睇（條片），大家都叫我冷靜啲，大家睇完都望住我，當時擔心佢哋對打，亦擔心爸爸有冇事。爸爸啱啱79歲生日，佢都成年啦﹗佢唔係一個慣打交嘅人，我都有打畀佢，唔知佢講緊電話定熄咗機。」
問到爹哋平時係咪好衝動？婷婷護父：「佢平時唔係咁嘅。」咁有冇見過爹哋咁暴躁？佢話未見過：「過往都好少，我哋做錯都係媽咪（狄波拉）教訓，通常如果要佢（謝賢）出聲，我哋自己都要反省。」
咁爹哋有冇體罰？佢話：「好少，都係媽咪教，打我就未試過，因為爸爸隻手好厚，今日會打畀再阿爸了解。（想八下？）唔係八，佢係一個大人，一定有佢原因。」
在旁Eric kwok插嘴：「四哥好瀟灑同睇得開，好講理由，做得一樣嘢都係有佢理由。」
婷婷再講：「媽咪都有同我呻過，當時佢同爹哋講，（謝）霆鋒喺樓下同人打交，爹哋就答：『幾叻喎，我都未打過交﹗』證明爹哋好少同人打交。」
Eric又話：「係東邪先可以令佢出手。我覺得佢（四哥）係宇宙最型，Rock Star。」婷婷則說：「個個睇完新聞，都覺得佢（四哥）型。」另外，講到姪仔Quintus發燒入院，婷婷話唔知，但會Message阿哥了解。
| 對於謝賢打曾江，謝婷婷未見過老竇咁樣，又話非常唔似佢。（資料圖片） |  謝賢怒摑曾江，全城哄動。（資料圖片） |  （攝影：陳志嵐） |
 謝婷婷坦言好少見過爹哋謝賢咁暴躁。 |  謝婷婷同郭偉亮宣傳新戲《有客到》 |
|
鍾意就快D Share啦！
|
|
|