又到農曆七月十四，喺呢個時候最適合講鬼故，雖然每年都講，但係啲故仔就講極都仲有。唔知係咪因為始終娛樂圈都係屬於偏門生意，所以藝人都比較容易遇到，以下嘅靈異故事嚇到藝人，唔知嚇唔嚇到你呢？
鬼同你睇李克勤演唱會
11年李克勤開演唱會，李克勤唱歌唱得好就唔係驚喜不過當年嘅「爆」位就係演唱會中出現咗一位不速之客。當時演唱會中驚現一位長髮靈體，仲要面青口唇白兼嘴角流血，唔知係咪聽歌聽得興奮得滯，佢仲飄浮係舞台嘅不同角落。而當時有一位觀眾疑似用手機影到懷疑係女靈體嘅巨型半身樣。
萬綺雯古老酒店現恐怖黑影
萬綺雯曾經試過膽粗粗一個人去墨爾本旅行，但因為太趕，淨係訂到一間古老酒店。一入酒店見到電梯開門都吱吱聲，都已經驚驚地。到佢瞓覺瞓到半夜半夢半醒嘅時候突然見到床尾有一個手長腳長嘅黑影對住佢嘅方向行過去，當然嚇到佢標晒冷汗唔知係咪因為咁佢要喺《我和殭屍有個約會》捉番啲鬼呢？
黃夏蕙屋企有水鬼
百無禁忌嘅夏蕙姨試過為主題公園孖住羅蘭姐扮猛鬼孖女，又試過行以冥婚做主題嘅fashion show，大家估佢唔驚呢方面嘅嘢？咁你就錯夏蕙姨話當年住西貢匡湖居嘅時候，每晚都會約埋好姊妹一齊整膠花。有一晩佢地就一邊聽鬼故一邊整膠花，突然之間聽到一聲巨響，之後佢地就見一個好似天仙嘅白衣女喺海飛左入佢屋企，嚇到佢同成班姊妹即刻衝落一層，之後大家都唔敢出聲。10分鐘之後，佢地又再聽到「蓬」一聲，跟住嗰隻水鬼就飛走左。但係之後佢每隔幾日就喺夏蕙屋企飛出飛入，所以佢最後決定搬走。
周麗淇挖墳被叫名
當年周麗淇同周子駒一齊拍攝恐怖電影《熱血青年》期間，有一場戲係要佢去墓地挖墳。當時落住毛毛雨，劇情仲講佢挖到屍蟲，成件事已經邪到爆。點知拍拍吓，周麗淇突然聽到有一把怪聲叫佢，不過當時佢淨係掛住拍戲無理到。拍攝結束，佢先問工作人員邊個叫佢，不過由於係現場錄音，所以無人敢出聲，亦表示當時並無人叫佢。不過同場一位幕後就話佢係同一時間都有聽到嗰把怪聲，嚇到周麗淇當堂打冷震。
Twins拍恐怖片靠拜拜
Twins以前拍咗一套搞笑嘅靈異電影《古宅心慌慌》，雖然套戲本身並唔係一套真係恐怖詭異嘅電影，但係唔知點解套戲開拍以來，劇中屢屢有人中暑入院，攝影機又經常無故失靈，小演員又成日扭計阻礙拍攝。直到後來周浚偉建議每日開拍之前先拜拜，起初係為咗安定人心，但係點知實行之後拍攝果然順利返晒。
朱茵沖涼被拍浴簾
有一次朱茵喺大陸拍戲嘅時候，期間走入洗手間沖涼，點知沖沖下，竟然突然有嘢不斷拍打佢張浴簾。但係朱茵當時明知間房中淨係得佢一個，所以她扮鎮定拉開浴簾，不過當然咩都見唔到，佢之後唯有不斷安慰自己繼續沖涼。
鬼幫你買奶茶
清水灣電視城向內猛鬼，當中盛傳最猛嘅就係古裝街同八廠，有工作人員聲稱，如果你喺深夜用八廠女廁去廁所嘅時候，你度門出面就會有「人」問你要唔要奶茶，如果你答唔要或者唔應佢，咁嗰個「人」就會一直問落去，好似要唔要咖啡，要唔要檸茶等等，要佢唔再問你嘅唯一方法就係答要或者唔該。
鄭俊弘被「屈」叫醒人
今次清水灣電視城嘅靈異事件就發生喺鄭俊弘身上，02年7月仲係訓練班學生嘅鄭俊弘，有一晚做到好夜，佢同一班同學唔決定喺電視城(當時仲喺清水灣)休息室過夜。佢同四個同學仔喺第二朝6點有通告，所以就專登校咗早上5點45分起身。當鄭俊弘起身既使下雨，就見到其中一個同學已經起咗身，跟住嗰個同學就話係鄭俊弘叫醒佢，不過佢啱啱起身點叫醒呢位同學仔呢？自此之後，佢都唔敢再去嗰間休息室。
《殭》拍攝現場有喊聲
03年開始無綫就搬咗去將軍澳電視城，但係新電視城依然猛鬼。早前都有一單就係喺錄影廠拍攝殭屍題材嘅科幻劇集《殭》一場關於羅莽及威利嘅拳賽戲份，演員唔知點解不停NG，錄影廠突然不斷傳出喊聲，仲要係好清楚聽到「嗚嗚」聲，當時個個都知咩事，但係唯有扮聽唔到繼續拍攝。
|
鍾意就快D Share啦！
|
|
|
