做二房東吸內地學生金 科大仔：我一蚊都冇出 [FACE - 431 - 大專校園] 房東,科大,房祖名,柯震東,MF,

林駿銘(Gary)

科大工業工程系 Yr.3

Gary Yr.1時住過半個學期宿舍， Yr.2靠「屈蛇」，「其實宿舍好緊張，好似我住荃灣，要個幾鐘返科大都冇宿，加上嚴打屈蛇，我就諗到可以搞一個分租床位嘅計劃，加上內地生有錢，要搵客源唔難。」

Main Camp

做二房東吸內地學生金　科大仔：我一蚊都冇出

各間大學宿位爭崩頭！每年七、八月開學前就係旺季，鄰近大學地區的租盤都被大學生瘋狂搶租。

就讀科大工業工程系 Yr.3的林駿銘（ Gary），睇準來港讀書的內地生搵租盤的市場，一年前與兩名科大同學透過互聯網設立「漂樂居」網上平台，租入單位後再以床位形式分租予大學生，實行做其「二房東」執租金差價。今年 Gary仲成功說掂新興地產中介公司 Q房網，讓他一口氣租用 30個單位，再將單位分拆成 133個床位轉租給內地生。未開學，現只剩下 8個床位未租出，年僅 21歲的 Gary一副地產經紀口啓，霸氣地說：「用 5000元租紅磡劏房，不如用 2950元租大圍名城（床位）」。

包埋傢私

漂樂居的租盤大部份傢俬都是訂造，「我屋企係做傢俬生意，所以用咩料、用咩色，屋企人都幫到手，價錢亦可壓到最低。」

漂樂居的獲利模式是透過賺取租用單位與分租時的差價，角色與二房東相似，要承受房間或床位空置的風險。滿有生意頭腦的 Gary事前一早睇熟內地生搵租盤的論壇，綜合各種內地生對租盤的要求，分析數據， Gary就頻頻出席科大舉行的投資論壇，攞住數據厚住面皮找投資者，「當然有俾人不屑過，但最終都有投資者投資，俾咗幾百萬我哋交 30個租盤嘅兩個月按金。我一蚊都冇出呀，邊有錢呀？我以前屋企住唐樓咋！」

為大計鋪路

冧掂 agent

內地房地產代理品牌 Q房網是漂樂居的獨家租務委託， Gary說：「經過投資者介紹下識到 Q房網老闆陳坤興，全靠 Q房網同啲業主傾先可以租上租。」

Gary的租盤多數是大型私人屋苑，樓齡新租金貴，所以就算分租後獲利根本不多，而且佢仲提供租後免費電器維修及每兩星期清潔服務，未畢業的 Gary亦直認回報只有約 10%，「所以下年諗住做一個校外宿舍，改建一幢舊樓，一層有 10-20間房、兩至三個廁所，其實間隔就似科大嘅宿舍咁，搞埋龍舟隊、食大碗飯呢啲大學傳統。不過改建一幢舊樓唔易，但已經有中型發展商同我哋傾緊，佢哋出錢，我就搵學生客租。」

滿口數據

唔怕欠租

Gary專攻內地生或國際生市場，「內地生係年付租金，唔存在欠租問題，免得我上堂搵香港同學追數！」

今年漂樂居租了大圍名城 8個租盤，只剩下幾個廳長床位未租出， Gary變相要白俾租給大業主，不過即使臨開學， Gary仍信心滿滿，「用 5000元租紅磡劏房，不如用 2950元租大圍名城（床位）。每年有超過兩萬人申請唔到宿舍，內地學生來港數目 5年間人數已上升至 1.16萬人，所以唔擔心客源。」 Gary滿口數字，對內地生市場有十足把握，雖然校外宿舍十劃都未有一撇，不過有呢個諗法、呢份勇氣已經贏過好多大學生！

科大校長陳繁昌（中）雖然支持同學創業，但 Gary成立漂樂居初期，其實學校沒有幫助，「係有媒體報導之後，學校就會話我哋知幾時有內地生嘅活動或者講座請咗咩嘉賓囉！」

漂樂居網站的首頁因應同學的要求選擇租盤的地區和宿生性別， Gary說：「港大同嶺大嘅租盤供應比數充足，所以主要做城大、浸大、理大、中大、科大嘅學生。」

Speed dating搵租客

能夠在合租前先透過聚會上輕鬆了解潛力合租租客的背景，絕對是好主意！

大學生都話有機會住宿舍，打工仔人工萬幾蚊，想租私樓真係天方夜譚。不過有網站就睇準合租居住的模式加入極速配對的概念，配對租客，呢個名為「 28室友網」的老闆 Peter說：「合租嘅問題係未見過對方就話要一齊住，所以我哋就加埋 speed dating，我哋會安排網站會員先喺 cafe見一次，合眼緣、好傾，大家有初步了解先再傾合租就會更加好，有唔少租客仲因為咁成為咗情侶！」除了見面，網站本身對租客的要求都幾詳細，個人習慣、睡覺時間、沖涼時間都有一一列明，搵到啱心水租客的機會大大提高！

撰文：校園組

攝影：林迅景

鍾意就快D Share啦！

下一篇 》