四年冇喺紅館開騷的呂方，往績一向麻麻，加上零宣傳，滯銷是意料中事。
探熱針
出晒事：半價散飛填位 呂方鄭俊弘攬炒
熊市壓頂，大家使錢都變謹慎，要氹到觀眾攞$680睇場演唱會，真係少啲本事都唔得。首當其衝的，包括上週末在紅館舉行一連兩場個唱的呂方，以及挾《星夢》餘威在九展再度開騷一場的鄭俊弘；兩人開騷前一星期，任何價錢的門票都冇爆滿跡象，同一時間網上劈價散貨，貴價飛一律半價$350有交易，要幾多有幾多，銷情慘淡出晒事，老如呂方，後生如鄭俊弘，都冇情講。
師奶都唔吼
前年在《星夢傳奇》奪冠，鄭俊弘水鬼升城隍。上週，有景後即拋棄女友姜麗文的花心男在九展第二度開騷，但《星夢》熱潮已過，加上今年全無代表作，就算鄭俊弘每次出席活動都落力硬 sell，始終對銷情無助。
至於愈大愈脹的呂方，緣滅紅館多年，但見前輩歌手有市場，決定捲土重來，但往績一向差強人意的他，即使搵齊徐小鳳、汪明荃等分量級嘉賓，一樣仆直。
銷情慘淡，臨近開騷，各路人馬爭相劈價散貨；開騷當曰，現場所見，有不少師奶客都肯用半價買呂方飛，相反，鄭俊弘繼續冇人吼。
自製露點高潮
上週六（九月五日），鄭俊弘在九展舉行《 The Red Concert 2015紅色演唱會》，自己歌唔夠，惟有靠其他歌手口水歌充撐，但鄭俊弘全晚不停走音、甩嘴，唯一高潮，是唱到林憶蓮的《滴汗》，穿白恤衫的他突然解放露兩點，同女 dancer互摸跳辣身舞，成功刺激粉絲，熱血沸騰。
至於另一邊廂的呂方，個唱亮點落在徐小鳳和汪明荃身上，兩位阿姐輪流上台搞 gag製造氣氛，冇欺場。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
