女神麥明詩（左後）成為「人生贏家」，記者原本順利約到她父母（前）接受訪問，但麥爸爸話「 Louisa問過 TVB」後，不方便受訪。
眾人諸事
TVB霸權 阻麥明詩父母受訪
新鮮出爐港姐冠軍麥明詩（ Louisa），最近成為宅男熱捧女神。會考十優、劍橋畢業、贏埋后冠，個個都話佢係人生贏家！到底女神是怎樣煉成的？記者上星期三打咗俾女神爸爸，即係聖公會林護紀念中學副校長麥卓生，想約佢做訪問，探究吓呢個問題。
麥爸爸當時第一反應係「都好吖」，佢向記者講佢同太太「都唔係 tiger、 helicopter」，否認係怪獸或者直升機家長；又話太太從事自閉症兒童教育，由細到大，主要由太太教 Louisa。至於詳情，佢講笑話：「依家講晒，訪問時咪冇嘢講？」同日黃昏，麥爸爸回覆記者話太太都同意受訪，約實星期六去佢屋企樓下會所做訪問。
誰不知同晚十一點半，麥爸爸傳來 WhatsApp短訊，內容係：「 Louisa問過 TVB，現時我們不方便接受訪問，遲些有機會再詳談， Sorry for the inconvenience caused」。記者問麥爸爸，係咪 Louisa合約問題以至冇轉圜餘地，麥爸爸都只係回覆：「總之暫時不方便，日後再談（再加個滴汗 emoji）」，完全睇得出麥爸爸有口難言。
喂！家陣同大台簽約嘅係 Louisa，你唔俾女神接受你杯葛嘅壹傳媒訪問，勉強都可以理解，但人哋爸爸媽媽嘅言論自由，唔通又關你事？大台真係大晒咩？
女神做《星島》 Google Translate寫稿
麥明詩參選港姐之前，舊年喺《星島日報》做過記者，呢段往事唔多人提及。《壹》仔收到風，當年佢喺《星島》的《每日雜誌》做記者，有人留意到佢每日拎住個靚袋返工，有少許「貴婦格」。
據了解，女神當時喺公司打電話都會講英文，而且非常流利，不過「做嘢麻麻哋」，準時收工唔 OT之餘，仲會用英文寫稿，之後 Google Translate做中文交稿，咁啲稿當然唔掂。有人質疑佢咁嘅背景走去做記者，其實係想參選前整靚個履歷。
女神冇固定座位，周不時會坐同事個位，有同事話佢會整亂人哋枱面啲嘢，有次仲拎咗男同事件外套著。男同事返工發現件外套放咗去另一個位置，覺得女神好冇禮貌。其實，女神可能係鬼妹仔性格，不拘小節。
女律師會所親熱被踢出會
深水灣老牌會所香港鄉村俱樂部，會員非富則貴，最近卻傳出有女會員喺更衣室同男人幽會，兩人情到濃時更不顧一切親熱起嚟，結果俾人取消會籍。有人向記者爆料，女主角係律師，多年前曾經同知名商人傳過緋聞。今次男主角係女主角律師樓嘅 trainee，事件已經喺部分會員之間流傳。根據女主角律師樓前職員所講，女主角對男同事比較親密，例如坐喺男同事側邊會挨埋去，隻手放喺椅背同人講嘢。
消息人士話，鄉村俱樂部入面貼過女主角被取消會籍嘅通知，記者入去睇過，但冇發現。更衣室職員同我哋講，冇聽過有人親熱呢件事，話職員之間啲「風」傳得非常之快，有發生過冇理由佢會唔知，仲反問：「報紙有冇報吖？冇就即係假㗎啦﹗」
記者打去女主角律師樓想問清楚，職員話會覆，但至截稿前冇回應；鄉村俱樂部話要先調查至回應，但截稿前一樣冇回應。
堅料網金主搞地產
香港網媒愈嚟愈多，最近又有一家「堅料網」加入新媒體大戰。記者發現，公司簡介話網頁由「生立有限公司」持有，董事係陳崇煒。查冊記錄顯示，「 Comkit Limited」係生立唯一股東， Comkit就由「金栢利秘書服務有限公司」持有，呢間秘書公司嘅唯一股東叫葉樹泰。即使佢四月辭任生立董事，咁計法佢就係堅料網嘅老細。
睇番葉樹泰有份參與嘅公司資料，大多數係投資公司，上年由中聯辦持有嘅九龍塘約道六號前九龍工作部，最後以 2.38億元售出，買家成信亞太有限公司，葉樹泰亦係其中一名董事，可見佢有涉足地產生意，但點解忽然插手傳媒生意就真係冇人知。
「堅料網」幕後金主作風低調，公司則打正旗號「不問立場，只問是非」，但從佢邀請返嚟做博客嘅就好有立場，包括建制派立法會議員梁美芬同鍾樹根，樹根仲自稱充滿文藝氣息的「藝術中年」，有少少難頂。
撰文：巫不言
插圖：王健威
news@nextmedia.com
|
鍾意就快D Share啦！
|
|
|
