爆壹爆
Party十二潮女 性感熱爆網
今年四月，一張十二名潮女穿上性感睡裙、喺中環夜場開派對嘅照片，上載到 facebook後，立即被網民瘋傳，網民又將各人起底。呢班潮女全部係爆哥 best friend，佢哋其實好多有正職，有啲係老闆、有啲係 OL、仲有學生妹。佢哋逢親老蘭開 P都會 call埋爆哥，呢啲機會大家唔恨得咁多。
派對搞手 Begonia就講，其實佢哋冇規定幾時搞一次 party，撞正朋友生日，又或者朋友想熱鬧，就會開 P，然後放相上網引班網民流口水。「其實冇諗過上次個（睡衣） party咁好反應，班女仔又玩得咁開心，所以今次再搞多個制服派對，今次玩校服。」佢仲話，使費視乎張枱可以坐幾多人，一般都要兩萬幾蚊㗎。
當晚，一班潮女喺中環夜場門口集合，個個都低胸上陣，一副戰鬥格，啲男人行過，都忍唔住眼望望，班女話唔知點解，落中環蒲就會性感，因為個個女仔都係咁著，戰衣嚟㗎，佢哋就係鍾意呢種感覺。仲話你唔性感，就會被比下去。
舞池人多，會唔會成日俾人抽水㗎？ Begonia話舞池係最危險，好多賤男會趁人多摸女仔 pat pat，她仲試過俾人摸下體，「就算你鬧番個男人，佢都會扮冇嘢即刻走，所以惟有自己小心，同埋依家多數同自己圍內人嚟玩，安全啲。」
上海仔回港再創業
話說勝和風頭躉「上海仔」三年前一場「小桃園飯局」，揭開政黑合作序幕，黑道中人見撈政治飯有着數，呢幾年慢慢滲入政壇，其中上海仔喺江湖地位急升，風頭一時無兩。
查實佢向來有老細命，只因上海仔識氹老細兼擦鞋，話說佢早年已經同「林大少」同埋「何家大小姐」好 friend，早幾年更加喺澳門識咗幾個賭場大亨，自此財源滾滾來，長期在澳門打躉。不過據聞爛賭二上身嘅上海仔，近排喺澳門輸大錢，於是要走返嚟香港避一避喎。返到嚟香港，上海仔又四出識人，聽講佢最近同大圈話事人「鳩 Dee」結拜，古惑仔爆料話，上海仔想巴結鳩 Dee大佬陳青華，據聞佢老人家有賭船，上海仔又可以再發圍啦。
中國隊神秘密碼
哥都有睇中港大戰，仲諗起一句話，就係呢排在港播放的大陸劇集《楚漢》，其中一段劉邦對話：「怕死的人結果死了，不怕死的反而活下來了。」嗰晚中港大戰參與嘅雙方球員，都係狹路相逢勇者勝，結果實力本來差好遠嘅香港，就憑打不死嘅香港仔精神，逼和中國。
唔講唔知，好多人以為香港隊喺大陸球員心中都係魚腩，其實唔係，有中國隊成員同爆哥講，其實國內唔少年輕球員，一直都活在 519的陰影下。即係 1985年 5月 19日的世界盃外圍賽，中國輸俾香港引發暴動。而中國隊中最具人氣球員之一張琳芃，就有呢個心魔一直喺內心深處，為了不忘「國恥」，佢將 519呢個有莫大意義嘅數字紋喺右手拳頭上。結果魔咒仍在，中國隊竟鬼揞眼只識得射門柱。
爆哥乜料
金融界撈家，穿梭黑白政商界，朋友遍布旺角至中環，每星期都八到
唔同料，同《壹》仔讀者過吓癮！
|
鍾意就快D Share啦！
|
|
|
