熱爆娛樂: 潮男新歡　跟周秀娜入更衣室 [壹週刊

2015年10月1日星期四

潮男新歡　跟周秀娜入更衣室 [壹週刊 - 1334] 周秀娜,M1,

24/9

娜姐新歡外形高大，又屬於運動型，完全符合她揀仔首要條件。

探熱針

潮男新歡　跟周秀娜入更衣室

多勞多得！周秀娜近年密密做，又開內衣店賣自家製胸圍，做埋老闆，搵落唔少，升呢住半山豪宅的她，啱啱考到牌就買了架 Benz自我獎勵。

一二年與拍拖六年男友陳偉成（ Avis）分手後，娜姐便打游擊，直至最近，終於有着落。上星期四（九月二十四日），她與一名高大潮男在圓方拍拖 shopping，其間兩人一齊走入試身室……

愛上運動型

晚上七時，露腰打出肚臍的周秀娜，與一名膚色陽光、高大身形的潮男一齊出現九龍站圓方，同行男子與娜姐之前公開男友條件完全啓合，「近期我鍾意游水，所以鍾意高大運動型男仔。」周秀娜說。

在室內都戴住黑超，唔少途人對娜姐眼望望，她亦一直與潮男保持距離，未有太親密舉動。二人先去 Chanel掃了一大袋，之後再去 Red Valentino睇裙，入到店內，娜姐放低戒備，同潮男愈黐愈埋，只見她揀了大批衫入更衣室試身，潮男竟然跟埋入去，兩人在內搞了幾分鐘，潮男才離開，同時間，發現潮男舔晒脷又用手抹嘴角。

近期網上瘋傳，國內疑似在 Uniqlo及佐丹奴，分別發生情侶走入更衣室內做愛，更用手機自拍四仔，作風大膽開放。見到娜姐同潮男走入更衣室，實在無限聯想。

離開試身室後， Harry舔晒脷，又用手抹嘴角。

娜姐試衫期間，兩人一齊走入試身室。

娜姐試衫時， Harry彎晒腰落手幫她整褲頭，氹到娜姐鬼咁開心。

周秀娜同前度 Avis拍拖期間非常恩愛，一齊去泰國旅行，娜姐更幫他推油。

食到閂門

之後轉場去 MARNI繼續，但兩人傾偈多過睇衫，講到興起時，娜姐更笑到揞住嘴，潮男新歡氹得娜姐好開心。其間娜姐試了一件恤衫，走出鋪面問潮男意見，只見對方郁手揭高件衫，在娜姐腰間整了幾下，她冇抗拒之餘，更表現受落。

瘋狂掃貨兩個多小時，娜姐同潮男拍拖醫肚，在 dab-pa坐低隱蔽位，邊食邊談心，傾到店鋪關門，先捨得離開。

兩人一齊去開餐，傾到間餐廳關門，他們先肯離開。

新牌仔娜姐揸住架新 Benz，載住新歡離開，但發現有記者，於是在香港站放低新歡。

之後娜姐獨自返回半山月租近四萬的千呎新居。

新牌仔

撐完枱腳，娜姐做埋司機，新牌仔，架 Benz A200亦剛落地一個月，掛 P牌的娜姐擺明新手，唔熟路要不停兜圈，又亂 cut線，綠燈可以行車時，又遲遲唔開車。

雖然手車屎，不過娜姐的警覺性依然高，行車冇耐已經發現被跟蹤，於是在香港站放低新歡，自己一個返回半山新居翠麗軒，潮男亦做足配合，在港鐵站左穿右插，成功撇甩記者。

製作公司老闆

據了解，娜姐的新歡叫 Harry Lam，年約三十多歲，擁有自己的製作公司，從事多媒體創作，與娜姐因工作認識，近兩個月，二人經常出雙入對，感情進展得相當順利。

早前娜姐更與新歡去紅館睇李克勤容祖兒演唱會， dry咗三年，娜姐再開齋。本週二，問到娜姐與新歡關係時，她面露不悅回應：「朋友囉！」之後問到對方符唔符合男友條件，想唔想拍拖等問題，娜姐都扮聽唔到拒絕回答。