拍電影期間，陳茵媺一度請假幾粒鐘返香港出席活動，但因為太趕，連探兒子亦沒時間。
探熱針
陳豪審批 陳茵媺復出
無綫逃亡潮沒完沒了，近日有消息指陳豪亦要走人，但實情他要到二○一七年才約滿，反而豪嫂陳茵媺於七月已回復自由身，原本打算專心湊仔的她，最近落實簽約前經理人陳嘉莉，為期一年，合約訂明她可以彈性選擇工作，陳豪才放心，讓老婆過戲癮。
信得過
有觀眾緣的陳豪，去年初被無綫氹掂留低，續約三年，其間雖然不斷有內地經理人公司招手，但亦要到二○一七年才可鬆綁。陳豪未走得，老婆陳茵媺一三年誕下大仔 Aiden後，已開始停工，到今年七月，跟無綫的合約亦正式屆滿。
「其實佢哋開始拍拖嗰陣， Moses已經提議 Aimee減產，結婚兩年生咗兩個，要照顧兩個小朋友一啲都唔輕鬆，所以 Moses根本唔贊成老婆復出。不過 Aimee始終仲後生，對做幕前依然有好大興趣， Moses先答應俾佢偶然客串吓。」陳豪身邊人說。
唔使衝鋒陷陣，陳茵媺選擇與前經理人陳嘉莉合作，頭炮是接拍賀歲片《開飯》。
「 Moses同嘉莉以前喺 TVB合作慣， Aimee簽俾嘉莉， Moses會放心啲，因為大家溝通慣，信得過！ Aimee只係簽咗一年，合約講明佢有絕對選擇權，自由度好大！如果係 TVB，合約根本無可能有呢種主導權。」
視像探仔
八月中，陳茵媺與杜汶澤隨劇組飛到馬來西亞開工，至今已一個多月，連今個中秋節，亦要在外地度過。
「 Aimee決定復出後，佢首要條件係盡量選擇留喺香港工作，就算返內地，都講明盡量即日來回，凡事以照顧兩個仔行先。佢答應接杜汶澤呢部戲，係因為佢好鍾意個角色，要同兩個仔分開個幾兩個月， Aimee都唔捨得，但又唔想錯過一個自己喜歡嘅角色同劇本，最後都破例接咗，但只要佢唔使埋位，喺片場都不時同兩個仔視像。」陳茵媺身邊人說。
過戲癮
06年港姐冠軍陳茵媺，入行後一直獲公司力捧， 08年以處境劇《畢打自己人》開始入屋，其後的《情越海岸線》、《單戀雙城》、《叛逃》等套套擔正。
11年合作《心戰》與被貪金廖碧兒拋棄的陳豪撻着， 13年爆出未婚有餡，陳茵媺即時辭演新劇《寒山潛龍》，並飛返加拿大娘家安胎，婚後兩年生兩子，全職做家庭主婦，幾乎淡出娛樂圈，今年七月約滿離巢無綫，兩年冇做幕前的陳茵媺，復出參演杜汶澤執導的賀歲電影《開飯》，過戲癮。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
