發現號、地獄黑仔號、梁師號......短短3星期，1.2萬人關注，3千人等候批准入谷，帶動將軍澳、上水、馬鞍山、觀塘、荃灣深井及沙田，出現隸屬不同地區的順風車群組，甚至幾間偏遠大學，如教院、科大及嶺南大學等，也有學生積極拉攏師生「友共乘」。香港的順風車文化，由「點會有得搞」到遍地開花，將人情紙咁薄變成遠親不如近鄰的，是「大埔街坊泥鯭」群組發起人呂忠義（Albert）。 記者：呂麗嬋
泥鯭的，是香港對共乘的士的俗稱，過去，是小市民街頭智慧的結晶；今日，被Albert重新演繹，成為「共享閒置資源」的網絡時代新交通模式。簡單而言，是車主或乘的士的街坊，在開車前於群組公布行程，包括出發地點、時間及目的地，俗稱「釣泥鯭」，順路街坊可加入，車主義載。而搭的士的街坊，則可分擔車費。「最初構思純功能性，無諗過個谷會有咁強凝聚力，好多做埋朋友，一齊消夜，仲順路帶埋陪睇醫生！」Albert說。
只要登上群組，就是透過冷冰冰的手機屏幕，一樣感受到暖洋洋的街坊情。置頂的，是Albert寫的谷友需知，洋洋灑灑幾千字，由保障篇到禮儀篇，由應否車廂內拍照到坐位佈局，鉅細無遺。為免吹水post淹沒主菜，鼓勵谷友將未過期的行程post置頂，方便查閱。無人駕駛卻人人自律，有谷友甚至自發設計泥鯭logo貼紙，變身「另類行車證」免費送給谷友，方便泥鯭搵車，儼如人人為我小社區。
「香港咁多爭拗，有幾何見到咁友愛？真係感動㗎」。除了區區有谷，他住的私人屋苑也設群組，旅遊旺季出機場，吹雞一樣無難度，「有需求但無諗過咁大迴響，好多機緣巧合，令好多人對順風車有美好體驗，除咗慳錢慳時間，仲好玩」。他囗中的好玩，是頭炮有幸與大埔任賢齊「共乘」！「嗰晚同老婆喺圓方睇完戲，放行程上谷，諗住搵人夾坐的士，遇正佢將行程放上去，話準備揸車返大埔」。
由釣魚變泥鯭，角色互換，一樣皆大歡喜。落車前的世紀合照，上載到平台，成為泥鯭谷首宗成功配對案例，靚樣加上久違了的鄰里互助情，一個小小的post，近2千個like。「互聯網傳播速度快，有平台分享行程，唔使單靠喺路邊截車，配對方便好多」。香港人口密度高，生活軌跡固定，出旺角，返中環，去機場…行出第一步，驚喜處處。「我喺大埔長大，試過喺車上撞番中學同學個細佬；又試過義載時傾開，先知其中一條泥鯭，係妹妹冇聯絡好多年嘅舊同學」。
重遇故友，那些年的回憶，微小卻溫暖，「喺大埔住咗30幾年，中小學都喺度讀，好多人喺街上撞口撞面，總唔會主動打招呼」。初中坐隔籬位，選科後再無聯絡的同學；小時候玩過跳飛機，長大後各有生活的鄰居，路上行色匆匆，同坐一架車，交匯點重新接上。原來，念念不忘的，不止自己，「每個人面前都有層薄膜，只要有人肯主動輕輕篤一下，就會穿」。這種猶豫不決，勇如Albert一樣有，就如推廣順風車，萌芽多年，諗到想做認定可行，總沒動力行出第一步。
「等車係切身感受，有時唔揸車，等小巴返屋企，日曬雨淋，見到有架私家車身邊開過，明明同路，總會心諗：可以車埋我就好」。這個念頭，不少人都有，但會伸手去截卻鳳毛麟角，至少，在這之前的香港，並不多見。今年二月，他遇上了，但角色調換，今次，他變回安坐私家車內的司機，「嗰日睇完醫生，喺大埔中心見到兩個少女舉紙牌：往大埔香港人順風車」。
駛過十米，他滿肚疑惑，「開車門前仲猶豫咗十秒，擔心係整蠱節目，會有班人撲出嚟」。持開放態度如他，尚且千迴百轉，遑論其他人。「後來先知佢哋係一班教院學生，做緊關於順風車嘅實驗」。靚女較著數？單身大隻男一定失敗？一次偶遇，埋下種子。自此以後，在車站見到人龍，他會較低車窗邀請同路人上車。「食檸檬比例好高，有啲直頭避開，唔想同你有眼神接觸」。
飛來蜢，怎會無目的？是普遍香港人的思維。可幸他從不易放棄，頻食檸檬反練就厚面皮，成立群組一呼百應，已是後話。「好多人心底都想做呢樣嘢，只係無人點起條藥引。就好似你見到個街坊，明明想打招呼，一剎那總猶豫，好觀望，想等對方先開口」。與其千迴百轉，不如化被動為主動，這個後沙士理大畢業，白手興家創業的八十後，的確與別不同。
小實驗成就奇妙旅程
返學放學，返工放工，固定路線，千遍一律生活，唔想咁樣可以點樣？八個教院學生，就成立學生團體「Nomadshk」，為營役生活創造意義，頭炮分頭截順風車返學，將過程拍成短片。誰知小小實驗，間接促成接載他們的好心司機成立組群，在港推動順風車文化，「無諗過一件小事，可以影響到人，感覺好奇妙」。畢業在即的教院四年級學生王子健（Benson）說。
「我都係入咗泥鯭谷，先知坐過佢順風車」。Nomad，寓意遊牧民族，不屬任何學生會組織，幾個志同道合的教院學生，拉雜成軍，矢志由生活開始，走出框框，創造生活中不同的可能性，「坐順風車返學嘅念頭，緣於有成員喺台灣嘅旅遊經驗，好想知喺香港係咪可行？」都說香港人冷漠又保守，事實是否如此？與其未審先判，不如落實狂想，做個有趣實驗。於是，6個人分成4組，由美乎、秀茂坪、元朗和上水分別出發，看誰先到。
結果，4組人都成功登上順風車，女同學不代表有絕對優勢，路邊苦等逾4小時；截順風車經驗最豐富的，反而敬陪末席。而Benson這個麻甩獨行俠，竟獲的士義載，一程車直達大埔，「我好驚訝，問佢係咪誤會咗我想截車？佢話只因順路，見我咁慘，想送我一程」。他說：「一個人，好容易未做就有太多假設，事實可能唔係嗰回事」。走出自製困局，天大地大，信不信由你。
既是host（接載者），也做過多次泥鯭，Albert強調街坊互助的關係平等，有谷友不是車主，就主動夾乘的士做包大人。（黎樹雄攝） 
就是這張與大埔小齊的世紀合照，成為泥鯭谷首宗成功配對案例，令外界驚覺，順風車體驗，除了方便環保乜乜乜，仲可以好好玩。（被訪者提供圖片） 
Albert鼓勵谷友在host（接載者）同意下，來張合照留記念，上載到平台分享快樂。其中大埔小齊是谷友眼中的街坊明星，歡樂合照最多。（互聯網圖片） 
有谷友自發設計泥鯭logo貼紙，變身另類行車證，方便泥鯭搵車，有谷友又再二次創作。由虛擬走到現實，這個另類小社區創意無限。（互聯網圖片） 
傳統順風車要站在路邊碰運氣，新模式利用互聯網平台配對，點對點，無需日曬雨淋。（被訪者提供圖片）