導演要求蔡思貝做一個驚嚇表情， NG四、五次先收貨。
娛樂偵訊
慣性甩對白走錯位 蔡思貝開工掛住玩
蔡思貝（ Sisley）自 13年當選港姐亞軍後，一直受 TVB力捧，未卸任已經有劇拍，早前更被影帝張家輝起用，參與他二度執導的電影《陀地驅魔人》，升呢做大銀幕女主角。
劇接劇的蔡思貝，在新劇《味想天開》中與「余黨」一哥洪永城做一對，初次拍古裝的她，週一（ 11月 9日）在馬鞍山拍外景期間，經常走錯位又忍唔到笑，加上同場埋位的肥媽狂食螺絲，兩個鏡頭拍足四粒鐘，累到全世界遲收工！
遲大到
舊將輪住走，無綫只好培訓新血補倉！包括二十四歲、有「發電廠」之稱的蔡思貝，密做不足一年，已經升呢做女主角；今年中開拍的新劇《純熟意外》，有傳她成功冧掂監製陳耀全，踢走李施嬅（前名：李詩韻）坐正，同吳啟華做對手。
「唔好睇 Sisley平時傻吓傻吓，佢好識揀人嚟黐，一有機會就同啲導演、監製 sell自己幾時有期可以搵佢拍劇，好進取！對住啲大星同導演就開籠雀，但撞見同屆啲港姐，佢可以直行直過，招呼都唔打個！」
成功在嘗試，積極𢱑job的蔡思貝在新劇《味想天開》繼續坐正，同余詠珊頭寵洪永城做一對。不過，出名記性差，成日甩對白走錯位的她，上位後開始出現慣性遲到。
「講對白經常 NG大家習慣晒，但近年佢成日遲到，仲愈來愈嚴重，選港姐嗰陣佢出名準時但而家就變咗例遲，試過有幾次開外景，全車人等咗佢成個鐘， Sisley仲要冇件事咁，講句唔好意思都冇；有時開工收工，又要外景車專登就佢自己方便嘅地方上落，好巴閉！」劇組人員透露。
勁 NG
本週一（九日）上午，《味想天開》在馬鞍山拍外景，先拍一場山墳的戲份，蔡思貝對肥媽講一句簡單對白，但她唔係忍唔到笑 NG，就係走錯位，加上肥媽亦狂食螺絲，有份埋位的洪永城只好在旁苦笑。
簡單兩場戲劇組預計一粒鐘多啲搞掂，但蔡思貝同肥媽輪流 NG，導演惟有停機放中午飯，食完飯，蔡思貝未有把握空檔記熟對白，反而掛住與洪永城嬉戲，直到導演叫 ready，才施施然補妝執頭。發現記者在場後，蔡思貝才立即上車攞劇本之後行埋一邊扮專心。提提蔡思貝，如果唔想再輸俾陳凱琳（同屆港姐冠軍），唔該俾心機，咪再咁小學雞。
撰文、攝影、攝錄：娛樂組
|
鍾意就快D Share啦！
|
|
|
