彭公在無綫 32年， 05年炮製的《東張西望》亦因他離去而改革，跟他共事過的一班台前幕後，早前為他搞榮休 party，唯獨朱凱婷未有出席。
娛樂偵訊
冇義氣拒出席榮休 P 朱凱婷怕秋後算賬
無綫「曾勵珍時代」結束，由行政總裁助理杜之克以及綜藝科總監余詠珊正式掌管，前節目發展分部總監彭濟材被迫榮休，連一手湊大的處境劇《愛•回家》，第二輯亦傳明年 3月收檔。
非余詠珊黨人人自危，昔日被彭濟材力捧做《東張西望》主持的朱凱婷，因怕被牽連，竟拒出席「恩公」的榮休 P。
不近人情
彭濟材上月中離開無綫，一班同事日前舉行「被迫榮休」飯局，獲邀出席的都是曾經跟他合作過的台前幕後，和由他一手構思的節目《東張西望》主持；不過公司大地震，有人怕被牽連，竟然自我審查，驚青到連去食餐飯都唔敢。
「好似朱凱婷咁，佢諗都冇諗過，就即回覆話唔出席。以前彭公（濟材）好睇佢，朱凱婷自己亦知喺戲劇組冇機會，所以都好積極，又成日上彭公 office傾偈；佢有機會做財經節目主持，都係彭公幫手，之後仲做埋電台節目同出書，估唔到佢會咁不近人情。」一名無綫人說。
朱凱婷怕影響前途劃清界線，不過，亦有唔少舊屬重情，照去！
「珍姐（曾勵珍）派嘅人肯定會俾人連根拔起，佢（朱凱婷）表明效忠其實唔一定可以留低。不過佢唔嚟冇所謂，嗰晚黎芷珊同宋熙年都有去，仲要由頭坐到尾，好多主持都有同彭公影相，唔似得朱凱婷咁冇義氣。」
改革換將
據了解，彭濟材一起身，他轄下的《東張西望》即以收視差進行改革，余詠珊黨開始登場。
「換人係無可避免！最熱門人選係陳貝兒，佢做開主持，有線時期又係珊姐嘅人，《東張西望》改革係最好機會，陳貝兒好大機會孭重飛，另外仲有李潤庭，都係佢啲有線愛將。」知情者說。
成敗在埋堆
娛樂圈講埋堆，閂埋門一家親的無綫更加！樂大媽時代珍姐年代相繼過去，無論有料冇料，想繼續有 job出鏡，就要新主睇你台戲，冇靠山，借歪！
撰文、攝影、攝錄：娛樂組
|
鍾意就快D Share啦！
|
|
|
