【成個Cool魔咁！】何嘉莉閃電再婚 嫁型仔飛機師
2015-11-07 19:40:00
何嘉莉未婚夫叫GeraldGerald fb截圖
現年35歲嘅前英皇小花何嘉莉前日被本報獨家爆料，指其與甜品店太子爺King離婚一年後，閃電再婚，計劃於本月中註冊。何嘉莉已淡出娛樂圈，未婚夫亦係圈外人，日前記者向準新娘恭喜，佢都只係透過短訊作簡單回覆：「沒有回應呀，謝謝關心！」
據悉何嘉莉嘅未婚夫名叫Gerald，係飛機師嚟，年輕有為。Gerald喺facebook貼出與何嘉莉嘅合照相，並用作封面大相，幸福指數爆燈。話晒何嘉莉向來係時裝達人，兩人嘅合照，當然係以型仔行先，佢哋揀咗一間餐廳嘅白色窗框，從街外影入去，喺玻璃倒影出英國巴士個影；兩人齊齊穿上黑白系列情侶裝，戴上黑超，仲擺出cool爆chok樣，友人留言：「gangstas（黑幫）」Gerald都俾like。
另外一張，係Gerald嘅工作相，穿上機師制服，同樣戴住黑超喺雲端上留影，與《衝上雲霄》嘅Cool魔有得揮。
何嘉莉16歲出道不久，就簽咗英皇做歌手，但事業未見起色。06年同甜品店太子爺King結婚後離開娛樂圈，全力投入時裝工作，可惜喺事業得意之際，舊年同King結束9年婚姻，喺微博發聲明，承認跟前夫因性格同生活理念分歧而離婚，兩人協議共同撫養3歲兒子Jean。
可能係兩人係去英國旅行時影嘅。 Gerald fb截圖
|
鍾意就快D Share啦！
|
|
|