掃呢頁CODE去手機

2015年11月18日 星期三

涉假學歷 扮 Single 大話妹蔡思貝分身瘟仔 [FACE - 443] :),蔡思貝,MF,

上週六( 14日),蔡思貝同男友麥秋成(左)一齊為好友許亦妮慶祝生日。 封面 涉假學歷 扮 Single 大話妹蔡思貝分身瘟仔 13年港姐亞軍蔡思貝,出道短短兩年,是非多到拍得住吳若希,緋聞男友數目更係同期新人之冠,堪稱大台新一代 ...


上週六( 14日),蔡思貝同男友麥秋成(左)一齊為好友許亦妮慶祝生日。

封面

涉假學歷 扮 Single 大話妹蔡思貝分身瘟仔

13年港姐亞軍蔡思貝,出道短短兩年,是非多到拍得住吳若希,緋聞男友數目更係同期新人之冠,堪稱大台新一代集郵女星。

鍾意溝仔唔係罪,不過 24歲蔡思貝最近被爆疑似報假學歷, 13年 10月透過國力書院報讀菲律賓比立勤國立大學的工商管理學士課程, 11月極速讀完,同年 12已經攞埋證書,快過打針!

麻煩事鑊鑊新鮮,但蔡思貝仍然有心情瘟仔。對外聲稱單身方便收兵,實則就繼續同大隻跳舞男麥秋成同居。咁識分身,大台應該度身訂造套《雙面伊人》俾佢啦!

冇家底冇後台的蔡思貝, 13年選港姐雖然不敵票后陳凱琳,不過得寵程度絕不比「嘉穎嫂」差,劇接劇而且戲份重,早前的《衝線》擔正做女一,未出街的《潮流教主》、《純熟意外》同拍緊的《味想天開》都係女主角,無疑係大台重點力捧新人!

去年 8月,本刊率先踢爆兩人拍拖兼同居。

蔡思貝近日牽涉假學歷風波,雖然大台力撐,但佢本人仲未企出嚟解釋事件,只連續講 9次「我要了解吓!」。

分車出入

深受監製高層喜愛,全因蔡思貝低調又識做。明明同大隻跳舞男麥秋成同居,蔡思貝都可以公開話自己單身,入行短短兩年已掌握「偽人」之道。

上週六( 14日),蔡思貝同男友麥秋成為好友許亦妮慶祝生日,經過去年被本刊踢爆同居,兩人今次都顯得格外小心,各自揸車出發,避免被影到同車出入。三人到將軍澳 Popcorn食飯,雖然蔡思貝盡量避忌,同男友前後腳分開行,但一入到餐廳即捉住男友雞啄唔斷,幾乎無視壽星女許亦妮存在。

入到餐廳冇乜人,蔡思貝即放低戒心不時望住男友甜笑。

離開商場時,兩人繼續扮唔熟,分車走人。

蔡思貝同許亦妮 goodbye hug後,就同男友分車走。

稱單身收兵

做戲做全套,離開商場時,蔡思貝又同男友刻意分開車走,自己揸 Beetle,而許亦妮就跟麥秋成同車,擺明搵老友做煙幕。事後許亦妮在 ig全力配合做大龍鳳,只 po自己同蔡思貝的合照,扮晒冇其他人在場。

「麥蔡戀」去年 8月被本刊斷正,有圖有真相,但蔡思貝多次否認,強調自己單身。擘大眼講大話,一方面可以討好公司、另一方面其實係方便自己周圍溝仔。

德國留學的蔡思貝,性格爽朗開放,參選港姐時有個老外男友,分手後分別同多個小生傳緋聞,包括大隻仔溫家偉、大孖周志文等,甚至有傳拍《衝線》時姣溝羅仲謙,令謙謙一度被楊怡逐出家門!

ig唔老實 網上圖片

今年 6月,蔡思貝出席活動時仍公開聲稱自己單身。

16/11 byebye

週一( 16日),蔡思貝離開清水灣寓所時,封口唔肯講假學歷同拍拖,只講 bye bye!但看她笑容滿面,完全不受涉假學歷影響。

大台盲撐

分身溝仔有術,分身讀書一樣掂!蔡思貝參選時報稱學生, 10年至 12年在德國讀德文課程, 12年 10月開始在德國海德堡大學修讀民族學和音樂,直至收到通知即停學返香港選港姐。

浸過鹹水本來好吃香,點知蔡思貝於 13年 10月透過國力報讀菲律賓比立勤國立大學的工商管理學士課程,並火速於 11月讀完, 12月獲頒證書。僅 1個月就做到學士,天才貝被質疑買學位,嚴重損害港姐美貌與智慧並重的形象。不過你有你恥笑,大台已講明盲撐蔡思貝,唔會奪去港姐亞軍名銜,繼續開劇力捧。滿口大話, so what?

入行前,蔡思貝有個立陶苑籍男友,但當選後冇耐即分手。 網上圖片

男友 WhatsApp回覆

同蔡思貝去街又斷正,麥秋成透過 WhatsApp例牌否認。 《蘋果日報》圖片

參選時仍與父母同住杏花邨,但自從與麥秋成拍拖後,即搬去清水灣村屋同居。 圖片

收兵高手

明明有大隻舞男做正印,蔡思貝都要扮單身收兵,差啲連羅仲謙都中招呀!

黃淑儀仔 徐肇平

成日約食飯見面,徐肇平 ig入面有唔少二人合照,又幫思貝拍片扮做戲,交情匪淺。

網上圖片

溫家偉

拍《衝線》時傳出緋聞,後來大隻仔轉冧吳若希,表示當思貝係兄弟。

周志文

又係拍《衝線》傳撻着,蔡思貝仲自爆會約大孖打友誼波——籃球。

校友王璐瑤:冇見過蔡思貝上堂

蔡思貝以 1個月極速完成菲律賓比立勤國立大學學士課程,被質疑學歷造假,事件爆出後,發現原來除了不少名人於此校畢業外,多個圈中人亦係校友。

王璐瑤

同樣係比立勤國立大學工商管理學士課程畢業的王璐瑤,對蔡思貝 1個月讀完覺得難以置信,「我讀咗 3年先畢到業, 1個星期上 3堂,份畢業論文要寫過萬字,我寫咗 3個月先搞掂!不過我咁耐都冇見過佢(蔡思貝),反而同李蘊一齊上過堂!呢單新聞搞到以為我呢間學校唔掂,所以𠵱家諗住報讀其他學校嘅課程!」

邵子風刪學歷

龍小菌經理人邵子風,原本在 fb寫 2010年畢業於比立勤國立大學,但假學歷事件爆出後,即刪走資料,做乜咁驚青?

李蘊認退學

會考僅 4分的李蘊,亦曾讀過比立勤國立大學,「公司幫我報,讀咗唔夠兩年,畢唔到業,讀咗等於冇讀!」

假的真不了

圖片

成日都話選美係黑箱作業,除咗唔係公平公正公開,其實參賽者本身都未必好得去邊!歷年唔少參賽者虛報身材、年齡、學歷,總之乜都可以係假!

圖片

葉翠翠 假鼻

05年冠軍葉翠翠,參選時是非多多,被指曾割雙眼皮、隆鼻同打 Botox瘦面。

陳茵媺 假大胸

06年港姐冠軍報稱 33.5吋上圍,但着泳衣時,卻現出與尺寸不符的岩石胸身材,有網友拎番佢 04年參選華姐時的平胸相比較,質疑佢曾隆胸。

《蘋果日報》圖片

邱淑貞 假下巴

87年參加港姐時,身為大熱門的邱淑貞被爆整容,惟有聲稱曾經跌傷下巴先會作出微調手術,但最後亦決定退選。

《蘋果日報》圖片

宮雪花 假年齡

95年參選亞姐,報稱 47歲,當時被質疑報細數,但仍勇奪第 5名,輸畀冠軍楊恭如等人。

《忽然 1周》圖片

鍾慧儀 假學歷

96年國際華裔小姐季軍,被踢爆並非所報稱的哈佛碩士生,最終被褫奪名銜。

採訪、撰文:娛樂組

攝影:娛樂突發組

鍾意就快D Share啦!