娛樂偵訊
錢都唔要 范振鋒彈何傲兒鐘
范振鋒出晒名瓣數多，在電台開咪、幫 TVB做主持、拍劇，仲要分身搞飲食生意、娛樂城、製作公司百足咁多爪，最近，仲做埋監製，夥拍導演林超榮開新片《江湖喜劇》。
據知，今年由英皇轉會到大名娛樂的范振鋒原有意搵老闆林建名投一份，不過爺爺愛孫情深，開出要以何傲兒做主角為條件，最後范振鋒錢都唔要，寧願另覓投資者，堅持彈走何傲兒！
宣萱吳啟華做串星
安排明年初上映的新片《江湖喜劇》，主要角色包括譚詠麟、伍詠薇、三嫂戚美珍、 BabyJohn蔡瀚億、蔡潔及新人談善言等，范振鋒拍住伍健雄擔任監製外，更親自出馬搵資金。
「阿范喺呢行咁多年，儲落唔少關係，幾年前已經講話想搞電影，今次佢初次做監製，所以特別緊張，每次喺外面撞到啲老闆，都會撲埋去 sell，除咗搵資金，亦親自傾演員，好似宣萱、吳啟華佢哋都答應客串，睇得出阿范好有人緣！」范振鋒身邊人說。
今年初加盟大名娛樂的范振鋒，亦一度打林建名主意，游說老闆投一份。俾錢冇問題，但林建名卻開出條件，安排「愛孫」何傲兒飾演 BabyJohn蔡瀚億的前度，同太陽力捧的蔡潔爭仔。
林建名都冇面俾
「部戲其中一個主要投資方係太陽娛樂，人哋已經擺咗蔡潔入部戲，再加條線俾何傲兒，就一定要改劇本；不過阿范更加嫌何傲兒戲屎唔夠班，所以最後寧願放棄俾大名娛樂投資，佢自己碌人情卡，搵咗個猛人投埋剩番嗰份。」知情者透露。
老細都冇面俾！對於嫌棄何傲兒一事，范振鋒在電話中回應說：「選角係睇吓邊個適合，導演同另一個監製都有一齊決定。（你搵過林建名投資部戲？）有傾過，有俾過計劃書佢哋睇，但部戲急住開，加上最後佢哋都話今次唔做喇！（因為要加埋何傲兒？）都唔係……本來有個角色幾啱何傲兒，不過最後都冇簽約，我哋又要埋班，所以冇咗呢個角色！」
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
