俞承豪六歲已經開始拍廣告，廿歲正值轉型時期選擇入伍，今年重新開始，接拍《 Remember》，少咗一份青澀，反而更加有魅力。
電視精
退役回歸 《 Remember》俞承豪做律師為父申寃
韓國男藝人面對最大嘅問題，就係服兵役。
好多男星年輕時辛苦工作積累人氣，到事業收成時就要入伍，闊別演藝圈兩年，隨時被後輩爬頭，退役後人氣大不如前嘅大有人在。
與其拖到三十歲「被押」入伍，不如早啲搞掂，返出嚟再搏殺！
今年 22歲嘅俞承豪當完兵，撞正「男主角荒」，成功上位做男一，喺新劇《 Remember》做天才律師，為爸爸打官司，仲同大佢七年嘅朴敏英發展出一段姊弟戀，實行趁機搶攤搶 fans！
《逆權大狀》編劇執筆
《 Remember》係一套倫理法庭劇，男主角俞承豪係一個擁有超強記憶力嘅天才，自小同佢相依為命嘅爸爸，突然被指係殺害女大學生嘅嫌疑犯，為咗證明爸爸係被寃枉，俞承豪利用記憶力成為律師，並邂逅法律系女同學朴敏英，幫手一起調查真相。後來發現案件背後牽涉大財團，男女主角要面對各種權力鬥爭，以及不擇手段嘅富二代嘅同時，男主角嘅記憶力開始慢慢衰退，究竟最後公義是否必勝？《 Remember》以法庭審訊為主線，喺韓劇中較少有，原來編劇係電影《逆權大狀》嘅尹賢浩，品質有保證，播出第一集之後，劇迷都大讚好有電影感，非常吸引，首播收視有 7.2%，成績不俗，相信之後應該有得升！
退伍後首部長劇
2015年多位當紮男演員入伍，朴有天、金在中、崔振赫、崔始源等等，仲盛傳下年輪到金秀賢、李敏鎬，大鬧小生荒。今年退伍嘅俞承豪就坐收漁人之利，剛成年 20歲就把心一橫先去當兵，而家返出嚟先係 22歲，前途無可限量。童星出身嘅佢，入伍之前喺最後一部作品《想你》做男二，口碑唔錯，今年 1月退伍，近幾個月密密開工，除咗《 Remember》，同時間喺收費電視台仲有另一套《想像貓》，以及同高雅拉合作、 12月尾上映嘅電影《朝鮮魔術師》，年尾狂衝將氣勢帶落下年！同俞承豪拍檔嘅女主角朴敏英，喺《成均館緋聞》及《城市獵人》之後未有佳作，今次同細佢七年嘅俞承豪玩姊弟戀，好彩對方個樣生得夠成熟，望落好順眼，兩個人一齊查案仲有動作戲，可觀性大增！
撰文：關錦雯
|
鍾意就快D Share啦！
|
|
|
