熱爆娛樂: 發哥劉華話事　《賭城風雲 3》女角全大茄 [壹週刊

2015年12月17日星期四

發哥劉華話事　《賭城風雲 3》女角全大茄 [壹週刊 - 1345] __,發哥,劉德華,劉華,周潤發,M1,

探熱針

發哥劉華話事　《賭城風雲 3》女角全大茄

《賭城風雲 2》去年在賀歲檔大收 11億人仔，食住條水再拍第三集，除了鐵膽發哥、冧庄的張家輝外，又加入刀仔劉華及張學友，投資陣容同樣加碼；不過人多意見多，本來跟劉華有談情戲，女角之一的晶女郎胡然，亦臨時被刪戲，女角變大茄。

大星片酬過億

《賭城風雲 3》卡士爆燈，刀仔劉華會再度回歸，跟師父發哥拍住上，張家輝亦接埋契大佬張學友加入，四條 king陣容，單是片酬已超過一億。

「（王）晶哥對《賭城 3》好有期望，票房目標係十五億，所以加多咗幾個大卡士，發哥同劉華已經好多年冇合作過，兩個人喺片場拍得好開心，好多時都會俾意見，愈拍愈有癮！因為場場都有大星，晶哥日日都要出現，如果冇佢喺度，根本冇人控制到場面。」片中工作人員說。

四條 king都有意見，男人世界，女角只有靠邊站，就連女一劉嘉玲，都被安排出場未幾，就要消失。

吃得開的嘉玲姐，雖然今部戲出場未幾已死，但袋足一部戲片酬，她自言賺得輕鬆。

發布會當日，胡然（後排左四）雖然唔係企第一排，但都安排在發哥身後搶眼位置。

發哥跟劉華 25年後再合作，未正式拍攝，二人已經跟在戲中飾演龍五的向華強玩自拍。

同關淑怡一樣

「嘉玲姐睇得好開，仲話部戲拍得唔辛苦，係咁意做吓，瞓喺度都賺到一部片酬好輕鬆。不過啲新人就唔會好似嘉玲姐咁識諗，難得可以同發哥劉華合作，好似胡然本來係劉華女友，都突然被通知唔使拍，原來係劉華想多啲個人發揮，入面啲感情戲 cut晒。不過晶哥轉數快，胡然雖然冇咗好多戲，但海報就有得出現，就算只係排到最尾一個，不過有成班巨星襯住，都叫有補償。」知情者說。

胡然有得留低，但擁 36E的崔碧珈就冇咁好彩，因大粒星戲重，有份客串的她最終被剪到消失，情況同當年關淑怡拍《春光乍洩》一樣。