上週六（ 26日），何傲兒終於步出家門，不過面對大批採訪記者就不發一言。
封面
老竇 14物業清袋 老母鋪仔賣 con 貪心何傲兒空心周子揚一拍兩散
講錢失感情是常識吧？又話真心相愛，又會開口埋口講錢，甩拖甩到周子揚同何傲兒一樣咁肉酸，呢個星期大家食花生係咪食到好飽呢？
靠女友上報唔係第一次，終於一拍兩散仲唔盡地一煲咩？有請娛樂圈新渣男周子揚，一分手即 call記者爆大鑊，力數何家全家貪錢需索無度，又自稱幫何家解決過廿萬稅項，不過就滿足唔到女友家姐何傲芝個個月廿萬生活費喎！左廿萬右廿萬，講到無底深淵一樣。據悉實情係有人連環擘腿俾女飛，索性反咬一口，求上報得逞仲有得轉移視線添！如意算盤其實有冇計埋花心又冇品，靠咁上 C1會賺到幾負皮呢？
為上報連割包皮都講得出口，仲有咩係周子揚噏唔出？上週四包皮王周子揚揀正平安夜向前度何傲兒及全家送大禮，公布完分手又再自爆內幕，自稱同何傲兒真心相愛，可惜何爸爸同何家姐向錢看，出到聲要每月廿萬生活費，有心無力忍痛割愛咁話。
何母聖誕節看鋪
平安夜周子揚爆大鑊，聖誕正日輪到何氏姐妹出招，聯合發聲明指周子揚說法全屬揑造，保留一切法律追究權利。不過連日遇着記者追訪，就一概保持沉默，週日（ 27日）更索性離港避風頭。
《 FACE》獨家捕獲在銅鑼灣商場開設蚊型大眼 con店的何媽媽，原來在周子揚口中貪得無厭、要求廿萬一個月生活費形同賣女的何媽媽，為賺每單不過一百幾十的生意，聖誕佳節幾日公眾假期照常一個人看鋪營業。何傲兒原本有個富貴馬主老竇何世根，但 04年 2月自行入稟高院申請破產，但其後又向法庭撤回破產呈請，而何父多年來購入的 14物業亦先後賣出，一家四口現租住日出康城。何父物業清袋，何母則要賣 con，被傳媒發現有盤小生意的何媽媽一見記者十分意外，雖然婉拒訪問，還是在請記者離開途中說了幾句。
少少鹹多多脆
絕對唔係幫金龜嘜萬里望花生賣廣告，係「兒子戀」年多以來不斷派花生，有十三啜又有照田雞，有假分手又有爺爺介入，花生份量略嫌過多，俾人唞下得唔得？
戀情極速升溫不過亦都估唔到咁快凍過水，十三啜報導出咗兩日，何傲兒又失驚無神宣布分手，話唔識保護自己。
F：《 FACE》何：何媽媽
F：講幾句啦，何太！
何：唔好喇，呢啲嘢乜嘢句都唔好講！
F：其實你有冇見過周子揚？
何：其實未見過……好似喺啲 Party見過，印象好模糊！
F：係唔係你同何生反對佢哋至會分手？
何：細路仔啲嘢冇得反對……唔好講喇，我仲要做生意。
空心老倌
其實開口埋口索求個個月廿萬生活費，真係咁易賣女求財又點會志在百呎鋪頭仔、一百幾十蚊生意仔！
相反自稱努力求財「滿足」何家需索的周子揚，圈中知名度、工作量少得可憐。 09歌手身份出道，唱歌唔掂再轉戰電視圈，演藝少作為，最響名堂就係有個西貢地王老竇同「 13啜傲兒 BB」。不過周父地產買賣全屬名下八間公司操作，完全冇周子揚份；而近年所謂積極工作考勻地產、金融、保險牌照的周子陽，實情收入不見增加，反而因為藉傾生意為名搞飯局狂食女報導就一個接一個。
花心蘿蔔
雖然俾唔起個個月廿萬生活費，但自稱俾咗何家廿萬處理稅項，據知情人士透露同樣係大話：「佢絕對冇俾過何家錢！再講要交廿萬稅前題係一年收入幾百萬，人哋有幾百萬收入就唔使靠佢嗰廿萬」
唔只金錢、講感情一樣句句不屬實。十月初被拍到與曹思詩孖住放狗又上樓，周子揚為表心跡向記者發表「我嘅心喺 Lily度」愛的宣言，其實當時周子揚已經與何傲兒正式分手，分手原因正是因為有人三番四次擘腿斷正。分手扮無事、分完手至走出嚟爆大鑊，前言不對後語又突然反轉豬肚，表面戇直的周子揚實情好難捉摸啫！
新聞王子
報新聞有主播界新聞王子，周子揚演藝事業發展麻麻，不過就最叻自製新聞無中生有見報機會，其實又何嘗唔係新聞王子呢？
Gordon
壞男人真係識一個就夠，衞蘭未出道時同 Rosemary前男友、夜店 DJ Gordon拍過拖， 06年出道爆紅， Gordon即刻自爆二人當年親密關係，嬲到衞詩都要唱首歌送俾佢：〈 Be A Man〉。
魏駿傑
正所謂好男不與女鬥，更何況當年擘腿，滕麗名都未出聲，多年以後魏駿傑反而無嗱嗱在微博開火：「難怪人家不要他，明智！這種賤人趁早撇低，否則後悔一輩子！」不過俾滕麗名一句 KO：「幸福嘅人唔會周圍鬧人！」
採訪、撰文：娛樂組
攝影：娛樂突發組
|
鍾意就快D Share啦！
|
|
|