熱爆娛樂: 紅館檔得咗　何韻詩報捷唱勻 18區 [壹週刊

2015年12月31日星期四

紅館檔得咗　何韻詩報捷唱勻 18區 [壹週刊 - 1347] __,何韻詩,M1,

何詩開創「 18種香港」 project，計劃唱勻十八區，密食當三番。

娛樂偵訊

紅館檔得咗　何韻詩報捷唱勻 18區

打爛飯碗都要發聲的何韻詩，去年的雨傘運動離開東亞後，因被內地封殺，再冇碼頭可泊的她，今年自組團隊，開創「 18種香港」 project；趁住聖誕檔期，何詩在旺角麥花臣開騷，音樂會以露營為主題，每場容納約一千觀眾，參與佔中後，何詩吸納了一班後生仔女支持，四場演唱會門票一開賣，火速掃清。

據知今次音樂會製作成本唔算高，何詩冇後台撐，都搵到食。

身份敏感

經歷多次入紙申請在紅館開騷失敗，何韻詩未有放棄，繼續同政府角力，最近終於收到通知，獲批一六年十月紅館檔期。當事人興奮在尾場公布消息：「原來堅持係有用！」

據知，身為傘兵的何詩因為身份敏感，今次開騷，一班圈中老友紛紛打退堂鼓，唔敢擺明車馬，只是私下暗撐。

「其實喺後台都見到好多 artists送嚟嘅花籃，亦有唔少人 send留言鼓勵佢，大家嚟唔到，阿詩都明白點解，唔會介意！人各有志，阿詩都唔想累到人，好似演唱會期間，每晚飯盒都有米芝蓮星級餐廳贊助，不過佢好識做，連多謝人都唔開名，都係怕搞到人哋。」知情者透露。

演唱會尾聲，何詩喊晒宣布，獲批紅館檔期，並激動說：「原來堅持係有用㗎！」

全個騷最揼本是舞台設計，以露營為主題，同觀眾幾乎零距離。

有利可圖

今次開騷，演唱會全個製作過程由音樂班底、服裝、揀歌，何詩都有參與，除了舞台成本較高之外，其他大部分有贊助，所以依然有利潤可圖。何詩亦打算食住條水，唱勻十八區，密食當三番。

「做完個騷放晒電，阿詩打算做背包黨，周圍去流浪見識吓，返嚟就會籌備紅館騷，亦會繼續『 18種香港』呢個 project，按計劃係每區搞一場，三個月唱一次，阿詩自食其力，冇話冇得做嘅！」知情者說。