探熱針
度蜜月 74日 胡杏兒環球造人
由拍拖到結婚，整個過程只有一年時間的胡杏兒和李乘德（ Philip），今個星期一（十二月廿八日）終於禮成，正式成為李太。
由於已經三十六歲，唔想拖變高齡產婦的杏兒，已安排好婚後 74日時間，去勻亞洲、歐洲同北美洲等十三個國家，進行馬拉松式度蜜月，希望盡快幫在圍村長大，家庭觀念重的老公 Philip開枝散葉。
孭四十兩金上身
胡杏兒加入人妻行列，下嫁金融才俊李乘德（ Philip）。星期一（十二月廿八日）舉行了一場浪漫又溫馨的豪華婚禮。
當日早上，杏兒著了一套人手縫製、價值二十多萬的 3D立體龍鳳刺繡裙褂，進行接新娘儀式，新娘手上戴了超過十對龍鳳鈪外，還有大金豬頸鏈，估計全身金器超過四十兩。
婚禮一氣呵成，下午到男家地頭，位於上水雙魚河的鄉村會所，舉行戶外草地行禮後，到晚上再移師到 Ritz Carlton酒店，筵開五十六席，宴請圈中人和親戚朋友，跟住直落到中環開 After Party，玩到凌晨五點。
據知，今次婚禮全程由 Philip一手策劃，杏兒只需要打扮得靚靚，做個最漂亮新娘， Philip花盡金錢同心思，目的是要給新娘一個難忘又浪漫的婚禮，不過，這些只是前戲，好戲在後頭。
馬拉松蜜月
忙完大龍鳳婚禮後，杏兒同老公會留在香港休息幾日，其間一對新人會返男家圍村祠堂拜祖先，快叉幾日後，一月三日就會出發，展開一個長達七十四日的馬拉松式蜜月之旅。
蜜月時間長，地點亦多，玩盡三大洲。第一站是日本札幌，跟住落東京，然後轉飛大溪地同新西蘭，再去 LA和紐約，之後在歐洲逗留廿日，由 Philip留學的倫敦玩起，而杏兒父母亦會在這一站加入，接住兩公婆會去埋巴塞隆拿、希臘及伊斯坦堡，北美洲到歐洲再返亞洲去埋杜拜，尾站是馬爾代夫，兩個半月環遊世界。
「呢個行程全部由 Philip安排，佢記低晒杏兒咁耐以來，同佢講過想去嘅地方同埋喜歡邊啲地方，仲要秘密訂晒機票同酒店，先通知杏兒叫佢同公司攞兩個半月假，俾老婆一個好大驚喜。」 Philip身邊人說。
提早生 B
家庭觀念重的 Philip，亦希望趁今次馬拉松蜜月，一擊即中，造人成功，兩個人去三個人返。
「杏兒原本打算一兩年後先嘅！因為佢啱啱先簽新公司，唔想咁快生，但 Phil就比較心急，想快啲有 BB，組織個更完整嘅家庭，後來杏兒都考慮再拖會做高齡產婦，於是答應老公，將生 B計劃提早進行。」胡杏兒身邊人說。
婚禮開支
Ritz Carlton酒席 $23,600× 56圍約 132萬
現場布置 約 80萬
勞斯萊斯兩架 約 2萬（車租）
賓客車七架約 5萬（車租）
新娘裙褂 約 20萬
婚戒及鑽飾 約 400萬
雙魚河會所場地費 約 20萬
約共： 659萬
蜜月開支
機票 約 50萬（全部商務客位）
酒店 約 30萬
約共：約 80萬
總開支：約 739萬
撰文、攝影、攝錄：娛樂組
插圖：朱桂葉
|
鍾意就快D Share啦！
|
|
|