秋生3萬票登基嗌加片酬
視帝、后終於出爐，分別由黃秋生與胡定欣「開齋」稱帝封后，據知賽前全民票數十分緊湊，連TVB內部投票亦未能達致共識，無綫最後決定根據全民投票結果來選出視帝、后，結果秋生以萬多票力壓陳展鵬封帝，胡定欣則以千多票險勝田蕊妮。「男配角」韋家雄，獲東網網民關注其得獎報道，東網粉絲讚好合共過萬Like。
無綫《萬千星輝頒獎典禮2015》前晚圓滿結束，賽前吸引近10萬觀眾投票，票數逾58萬票！由全民投票及TVB評委會各佔50%票數選出的視帝、后大戰中，據知各前列候選人票數一直十分接近，爭持不下，但到截票前觀眾踴躍投票，票數急增數萬票而令形勢明朗化，最終全民投票部分由黃秋生以三萬多票成為票王，拋離陳展鵬萬多票，第三位則是陳豪。視后胡定欣則搶得近兩萬票，險勝第二位的田蕊妮千多票，第三位則是汪明荃。視帝、后於全民投票部分鬥得難分難解，連TVB評委會內部投票亦各持己見，經多番討論亦未能達致共識，評委會最後決定尊重民意，由全民投票結果選出視帝、后。
「第一次覺咁巴閉」
頒獎禮全晚平均收視29點，最高一刻則是宣布秋生勇奪視帝，高達35點！秋生得獎後接受訪問時坦言，初登視帝寶座令他戲癮更濃，不排除再拍無綫劇：「同工作人員合作得好開心，但我哋有啲條件，唔似後生咁捱得。（唔想出埠？）係紙杯都要寫清楚呀！」曾奪影帝與舞台劇最佳男主角的秋生擸埋視帝，會否覺得贏得大滿貫？他笑說：「舞台劇獎就唔記得喇！（下個係奧斯卡？）梗係（點慶祝？）要早瞓呀！要排舞台劇，畀自己瞓晏少少。」提到台上有感而發講到梅艷芳遺物被拍賣，秋生說：「其實唔形容為內衣，將佢形容為舞衣得唔得呀？仲有好多獎都好有紀念價值，證明演員努力同對社會付出，係值得尊重！（頒獎畀陳凱琳時佢好緊張？）我仲驚啊！如果到時唔係佢得獎，我驚佢會喊，以為我又整鬼佢！」
昨日，出爐視帝秋生與蘇玉華等繼續為舞台劇綵排，席上開香檳慶祝。秋生表示凌晨4時才回到家，完騷後只在街邊食麵「醫肚」，身兼影帝、視帝與劇帝的他笑說：「巴閉呀！三元及第，第一次覺得咁巴閉，真係要多謝無綫。（陳展鵬失獎不悅？）係咪佢Cool咋！我就覺得係有型，佢有恭喜我，好大體。（再拍劇？）唔排除可能性，但片酬要添啲。（網民要求公開票數？）每個比賽有唔同嘅評審準則，冇絕對嘅公平。」而《梟雄》拍檔蘇玉華對劇集成大贏家感美滿。
台前幕後慶功去「滾」
至於在無綫捱足20年的韋家雄終憑《梟》劇贏得「最佳男配角」，他領獎時全台藝人振奮，不斷上前與他擁抱及握手，連《東網》網民亦十分關注他的得獎報道，點擊率爆升之餘，還獲得逾萬個Like！對於得獎，家雄認為秋生功不可沒，因對方不時在訪問中讚其演技，而令他的演出受關注。問到會否覺得獎項來得太遲？他笑說：「唔會，好過唔嚟！」問到秋生哪一句說話改變了他？在旁的秋生即笑着搶答：「我問佢Canteen喺邊！其實佢潛力好大，有咁大潛力冇畀人睇到，做咩要左掩右掩？有咩嘢要畀人睇先得，唔好收埋。」得獎後，家雄與《梟》劇台前幕後包括監製王心慰、梁琤及楊明等打邊爐慶功，他希望能與秋生再合作，稍後亦會請對方食飯。梁琤則希望《梟》劇開前傳，食飯時大家還討論前傳故事的設計。
文：影視組
|
鍾意就快D Share啦！
|
|
|