城城搭鞏俐有新鮮感，《三打》也是影后首套魔幻動作電影。
娛樂偵訊
鞏俐半天吊 城城眼都唔眨
14年的賀歲片《西遊記之大鬧天宮》，內地票房錄得逾 10億人民幣，投資者決定系列式拍下去，隔年賀歲！今集《西遊記之孫悟空三打白骨精》，孫悟空一角由宇宙最好打甄子丹，變成舞台王者郭富城，為了做好 monkey king，開拍前三個月，城城開始加操接受武打特訓，到正式埋位，除了造型化妝導致皮膚敏感，又堅持盡可能親自上陣打，受盡皮肉之苦，是入行以來最辛苦的一部電影。
扮孫悟空已經辛苦到不得了，但眼見對手是毫無動作經驗的鞏俐，為怕對方不習慣吊威吔，開工初期，城城全程「芒」實，免得影后用錯力受傷！
一苦接一苦
賀歲片《三打白骨精》的動作場面多，想親自落場完成所有動作場面的郭富城，開工前三個月開始進行武術特訓，有深厚舞蹈底子的他，打筋斗、吊威吔根本無難度，被考起的是孫悟空的隨身武器——金剛棒。
據電影動作導演洪金寶說，戲中那支道具金剛棒分量十足，鏡頭外照樣棍不離身練習的城城，周不時被自己打中，搞到一腳瘀傷。每日開工的特技化妝和落妝，更加是災難！
郭富城坦言自己的皮膚向來矜貴易敏感，所有衫的 label都要先剪後著，偏偏今次扮孫悟空，每日要在面同身黐成萬條毛，簡直是人生酷刑，「真係好難頂！」郭富城說。
全日唔飲水
受盡皮肉之苦的郭富城，每日凌晨四點通告，齋坐七粒鐘化妝，就算在大凍天開工，身上套上肌肉衫可以焗到全身濕透；而為免除著麻煩，阻礙拍攝進度，城城索性全日滴水不沾。
雖然一早有心理準備，拍《三打白骨精》會比以往的電影辛苦，但實際辛苦程度，完全遠超郭富城所預期。
「一場文戲等於跳一隻舞，拍一日戲等於開三場演唱會！」郭富城說。
落場督工
繼國際章後，郭富城今次對手同樣國際級！飾演白骨精的鞏俐，更為《三打》奉上第一次；吊威吔！明知鞏俐係初哥，拍吊威吔場口，即使冇自己戲份，郭富城都會落場跟眼，有時又會俾吓意見，點郁效果會好啲。
不過，夠膽公開指責台灣金馬獎的鞏俐果然大膽過人。「吊威吔好有意思，覺得在半空比站着舒服，又不需用力，完全沒有半點恐懼！」鞏俐說。
鞏俐被吊高嗌過癮，難為一班工作人員同郭富城，金睛火眼𥄫到實！
撰文、攝影、攝錄：娛樂組
|
鍾意就快D Share啦！
|
|
|