新戲降 grade做阿二，香香拍醒獅戲時舞唔掂個獅頭，搞到要搵替身頂上。
探熱針
掛住拍拖貶做女二 戲屎香香舞獅失手
去年同加拿大籍金融才俊 Joshua撻着的岑麗香，同男友車廂熱吻返歸過夜，自拆「處女」招牌，形象幻滅。雖然經理人出黃牌警告，但香香一於少理，繼續拍拖大晒！唔聽話，無綫老規矩！在新劇《火線下的江湖大佬》，香香戲份少過陳煒、苑瓊丹。日前劇組在沙頭角拍外景，要在戲中舞獅的她，雞手鴨腳，擔住個獅頭擰來擰去，舞極導演都唔收貨，最終要出動替身代勞，嘥晒啲時間！
資質有限
無綫新劇《火線下的江湖大佬》由老戲骨孭飛，三年冇拍大台劇的鄭則士回巢同陳煒擔正；至於被貶做女二的岑麗香，去年拍攝《實習天使》時，曾被對手洪永城藐爆更當眾踩：「你咁咪唔 natural囉！」今次更加要對住班演技派前輩，香香戲屎更戲屎！
在劇中香香飾演一個鍾意舞獅的上班族，事前亦惡補了一段日子，希望拍劇時可以似模似樣。
拍攝當日，香香先在一旁拉筋、壓腿做熱身，又聽從師傅指導，練習動作走位。到正式埋位，擔住十磅重獅頭的香香好似擔泥一樣，舞極都舞唔掂，頻頻 NG，連同場負責打鼓的陳山聰都打到冇晒心機。自知累街坊，香香惟有以笑遮醜。
替身代勞
香香舞獅雞手鴨腳，導演冇晒符，只好叫替身頂上，到最後拍拎住獅頭擺 pose的近 shot，再叫番香香埋位。
靠替身過骨的香香之後見到老友沈卓盈，即刻捉住對方嗌救命，又講到扁晒嘴，沈卓盈就不停加以安慰。
「香香呢排好多投訴，佢話自己要背中文對白已經好大壓力，仲有每次練完舞獅，兩隻手都又痠又痛，返到屋企要捽按摩油，搞到手瓜都粗埋。」劇組工作人員透露。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|