探熱針
王晶女幫到手 《愛•回家》何君誠趕住追
無綫去年高層大執位，戲劇組揸弗人曾勵珍明升暗降變成顧問後，杜之克聯乘余詠珊的新勢力正式坐正，曾系馬房藝人工作量愈來愈少，人心惶惶。
另一邊廂，老豆王晶是殼王陳國強同學的王子涵，入無綫成為最新「米飯班主」，一班二打六為要爭取拍劇機會，對王晶女落足鞋油，在《愛•回家》做老闆的何君誠，更加追到出面。
因父之名
去年六月賣身無綫八年的王子涵，有個跟老闆陳國強由細玩到大的老豆王晶撐住，被安排做《姊妹淘》扮靚節目主持，又拍台慶劇《城寨英雄》，近日鄭則士回巢出力的新劇《火線下的江湖大佬》，王子涵都有份，簽約半年多啲，已經做到冇停手。
朝中有人好辦事，有老豆鋪橋搭路的王子涵，亦冇避嫌，公開多謝王晶為她帶來現成的人脈網絡。
「佢係王晶個女，人人都會俾面，有乜活動去蒲去玩，一定預埋佢，最緊要係打好關係！好似早排王晶入無綫幫自己監製部新劇搵人，幾乎全公司後生嘅演員都有份去 casting，僧多粥少，如果王子涵喺晶哥身邊講幾句，機會自然大好多。」知情者說。
據了解，去年王晶為無綫開拍一部中港合資古裝劇，便用了王祖藍和鍾嘉欣；稍後會再開一部以賭為題材的新劇，預咗黃宗澤、李詩韻孭飛外，無綫亦有意栽培新人上位，所以一班冇派系冇馬房照的藝人，幾乎全部被通知試鏡。
機不可失
「好似何君誠咁，本來喺《愛•回家》戲份好重，當時佢仲好開心咁周圍話俾人知自己孭正，不過珍姐落馬後，套劇都要摺埋。要幫自己諗定後路；所以佢近排同 Ada（王子涵）玩得好埋，除咗一班人聚會，私底下都好進取，經常單獨約 Ada睇戲食飯，擺明車馬咁追。
「另外大孖周志文舊年因為唔停溝女，俾樂小姐解約叮走，雖然離開咗無綫，但佢有黐住一班舊同事玩，亦都成日借啲意埋 Ada身，約佢去蘭桂坊飲嘢，無非係借機會就講吓自己嘅慘況，就算返唔到無綫，都搏吓機會拍電影。」知情者說。
何君誠搏大霧追、周志文搏同情，一班二打六例如香港先生李晉強、翟威廉亦冇走雞，只要王子涵有份出現的聚會，都盡量出席，機不可失。
夠照
星二代有冇料其次，最緊要係家中星爸或者星媽夠照夠牙力，例如老豆係成龍的房祖名，或者爹哋叫曾志偉的曾國祥，努力做同唔努力都一樣，但圈中人照俾面，唔顧細都顧大。
房祖名
在老豆成龍穿針引線下， 04年簽約楊受成的英皇娛樂加入娛樂圈，一入行即有機會擔任電影《千機變 II之花都大戰》男主角，兼唱埋主題曲。 05年成龍又出手，安排房祖名在爾冬陞執導的電影《早熟》做男一，另外導演陳木勝、姜文等，亦因成龍關係，先後用房祖名。
曾國祥
02年入行，在老豆曾志偉安排下，先為陳可辛擔任助理及場務等幕後工作，之後有機會在吳君如的《金雞》演出一角。為兒子事業鋪路外，追女仔志偉亦幫到手！ 14年為無綫監製劇集《 M Club》，劇中演少女版李麗珍的王敏奕深得志偉歡心，曾國祥更在老豆推波助瀾下，成功將對方追到手，志偉對未來媳婦亦很關照，之後又安排她拍電影《麻雀王》做女主角。
撰文、攝影、攝錄：娛樂組
|
鍾意就快D Share啦！
|
|
|