熱爆娛樂: 前妻同老公傾和解　有餡葉翠翠啜爆金魚街 [壹週刊

2016年1月28日星期四

前妻同老公傾和解　有餡葉翠翠啜爆金魚街 [壹週刊 - 1351] __,翠翠,葉翠翠,M1,

週一（ 25日）晚，葉翠翠偕老公 Raymond到金魚街買卵石布置魚缸，二人有商有量，連尺寸都一絲不苟。

娛樂偵訊

前妻同老公傾和解　有餡葉翠翠啜爆金魚街

去年 7月，葉翠翠與建築師老公周曉東 Raymond結婚，偏偏遇到老公離婚八年的前妻 Grace Lam贈興，排快期向法庭入禀要求加生活費，雙方對簿公堂。

據知，法庭安排二人週二（ 26/1）傾和解，拆掂有轉機，葉翠翠亦傳來造人成功好消息。週一（ 25日）晚，心情靚爆的她孖老公到旺角金魚街買水藻，二人連體嬰黐到實，男方更連環攬啜戴罩翠翠，好肉緊。

金魚街格價

老公與前妻的官司拖拖拉拉，不過葉翠翠夫婦卻未有受影響，近日更傳造人成功，但因未夠三個月唔講得。

週一（一月二十五日）晚，老公 Raymond與前妻傾和解前夕，戴口罩的翠翠心情大好同老公到金魚街買水藻；二人穿黑色情侶外套，由街頭行至街尾逐間格價，做人妻後，慳得就慳。現場所見， Raymond對老婆呵護備至，幫手除安全帶，全程拖實，矜貴過女王。其間，又忍唔住兩度攬啜老婆面珠， sweet。

「翠翠同 Raymond結婚後一直不設防，翠翠都三十四歲，有仔趁嫩生，又可以俾退咗休嘅爸爸湊吓孫有寄託，仔女都冇所謂，生完就收工。為咗一擊即中，翠翠一直有中西醫合璧調理身體，原來真係 work！不過就算有咗都唔可以講，有風水師傅提過佢，未到五、六個月，都要收埋。」葉翠翠身邊人說。

揀金魚期間，翠翠和老公一直拖住手未放開過，嚟緊家中將有新成員加入，恐怕再冇乜二人世界。

有傳翠翠造人成功懷胎三月，當晚記者發現 Raymond連安全帶都幫老婆除，服侍周到。

行街期間， Raymond忽然忍唔住啜了老婆兩啖，新婚半年仍然激情。

前妻有得傾

要養多個人仔，就要努力賺錢。去年 Raymond前妻 Grace Lam，排快期向法庭入禀要求前夫把生活費由二萬元，加至四萬六千元，再組新家庭的 Raymond當然拒絕。官司纏擾接近一年，近日在法庭調停下，雙方於下月初上庭前見調解員，嘗試和解。

週二（二十六日）上午，記者發現 Raymond與前妻前後腳由律師陪同，到中環一商業大廈見面。

「 Grace同 Raymond○九年離婚，依家同個靚仔鬼佬廚師一齊，本來相安無事，但自從 Raymond同葉翠翠拍拖嘅消息出街後， Grace就提出話要加生活費。又試過無厘頭出律師信 send去無綫俾葉翠翠，向 Raymond追錢，搞到全公司知道原來葉翠翠男友結過婚。依家佢肯坐低傾，可能係諗通咗！」知情人說。

記者曾聯絡葉翠翠，但她只以短訊回覆：「不好意思，很多事情不方便講。」