掃呢頁CODE去手機

2016年1月28日 星期四

拍劇墮坑腦震盪 馬蹄露:個身會不受控咁搖 [壹週刊 - 1351] M1,馬蹄露

探熱針拍劇墮坑腦震盪 馬蹄露:個身會不受控咁搖昔日在《真情》演活野蠻「MayMay」的馬蹄露,去年憑《鬼同你OT》獲提名「最佳女配角」,近日出街的《鐵馬戰車》亦受網民大讚。但估唔到,在鏡頭前表現生鬼的她,三年來飽受拍劇發生墮坑意外,搞到腦震盪而引致創傷後遺之苦,一直需服食精神科藥物。手停口停,馬蹄露撐住開工,怕精神科藥副作用影響記對白,索性開工停藥,寧願靠意志去打仗。受長期類風濕及創傷後遺所折騰, ...


探熱針

拍劇墮坑腦震盪 馬蹄露:個身會不受控咁搖

昔日在《真情》演活野蠻「 May May」的馬蹄露,去年憑《鬼同你 OT》獲提名「最佳女配角」,近日出街的《鐵馬戰車》亦受網民大讚。但估唔到,在鏡頭前表現生鬼的她,三年來飽受拍劇發生墮坑意外,搞到腦震盪而引致創傷後遺之苦,一直需服食精神科藥物。

手停口停,馬蹄露撐住開工,怕精神科藥副作用影響記對白,索性開工停藥,寧願靠意志去打仗。受長期類風濕及創傷後遺所折騰,還要承受昂貴醫藥費,馬蹄露說:「冇諗過係咁大鑊!」

頸腰椎盆骨歪晒

年多前,本刊已發現口罩加帽,將自己包到冚的馬蹄露到法國醫院睇腦科,等候期間亦見她上半身不自控地不停搖晃,搖動的幅度頗大。

據了解,一三年馬蹄露在內地為李添勝監製的台慶劇《巾幗 3之諜血長天》拍外景,有場戲劇組 PA頂替臨時演員扮司機,駕駛在內地租借的古董電單車,載住因配合劇情不能戴頭盔的馬蹄露,結果,拍攝期間車輛失控墮入深坑,馬蹄露頭部猛力撼落電單車的鐵架,當場爆缸。

「佢當時撞到暈陀陀,去醫院縫針後第二日又埋位開工,大家都冇諗過咁大鑊!到第三日添哥知道有意外,即刻趕馬蹄露返香港再睇醫生。」一名劇組人員說。

拍《巾幗 3》受傷,可惜此劇長放雪櫃,不見天日。

腦受撞擊後幾日,後遺症開始出現,全身骨痛,經脊醫檢查下,發現馬蹄露由雙肩至頸椎、腰椎及盆骨,全部歪晒;之後還陸續有來,身體會出現失控搖晃的情況。

「馬蹄露有即刻睇急症,照過磁力共振話係由腦震盪所致,身體會搖之外,亦行唔到直線,好易暈。」

年多前,包到冚的馬蹄露被發現在私家醫院求診,其間上半身搖晃不停。當日為她診症的韓醫生,屬腦神經科。

求醫被當波咁踢

本身已長期抵受類風濕關節炎折磨的馬蹄露,還要承受腦創帶來的漫長煎熬,求醫初期,要不斷測試適當的治療方法,被幾個醫生當波踢,令她感到十分無助。

「開始嗰段時間佢睇過幾次私家醫生,知道手尾長,需要一段時間去醫後,佢怕負擔唔起私家醫藥費,惟有睇由公司保險轉介嘅醫生同政府醫生,但個個都只係開止暈丸俾佢就算,有個甚至叫佢不停同自己講唔係暈就得,又唔開藥又唔俾佢排期覆診。

「之後佢撐住拍《點金勝手》,但個人搖到天旋地轉好辛苦,馬蹄露辭演,但監製同班演員 MC Jin、 Toby(梁靖琪)都𦧲佢再試吓,大家寧願遷就佢,或者埋位俾張枱佢挨住,有時又專登俾佢繑住借力。」

出現腦創後遺症十個月,終由一名醫生建議,轉介睇精神科。服食精神科藥被副作用影響,令馬蹄露十分沮喪。

25/1又睇醫生

本週一,出席完新劇活動的她,走返家住的大埔睇中醫,不過事後她稱只為醫鼻竇炎。類風濕加創傷後遺,鏡頭前的她完全睇唔出係藥煲。

當日墮坑後,據悉出事的電單車漏油隨時爆炸,撞到頭暈的她卻無力逃走。幸得幕後寶哥跑到現場抱走她,成救命恩人。

13年拍《巾幗 3》意外墮坑後,馬蹄在微博上載爆缸相及瘀腳相。

01年,林建明被電視台布景板撞傷腦,之後患上驚恐症。

三句對白都記唔到

「醫生話馬蹄露個腦嘅軟組織受衝擊,令佢失去平衡功能,食精神科藥可以幫佢平衡,唔會搖;不過食咗藥又出現記性差,當時佢拍緊《鐵馬戰車》,背三句對白都好難,一場戲可以 NG十幾次,有啲人唔知情俾面色佢睇,好在監製陳耀全同吳家樂一早知咩事,又安慰佢話慢慢嚟。

「之後開工馬蹄露索性停藥,寧願搵道具扶住等自己企穩。之前拍《誰家灶頭冇煙火》類風濕發作,手關節又腫又痛,都係靠意志力頂住,所以而家停藥開工,係可以睇唔出佢有事。馬蹄露話醫生都建議佢繼續做嘢,分散注意力,對創傷後遺反而有幫助,加上手停口停,冇可能停工唔做。」知情者說。

開工就停精神科藥的馬蹄露,因身體不停搖晃,故在《鐵馬》經常雙手按住道具借力平衡。

去年台慶頒獎禮,馬蹄露罕有盛裝打扮,原來慳家的她身穿的是數百元的 ZARA長裙,只經她親手釘上水晶,即變平衫貴著。

《鐵馬》開拍前,監製陳耀全(黃箭嘴)已知馬蹄露的病,仍堅持用她,令馬蹄露感激不已。

排咗年幾等到睇街症

本週一(一月二十五日),出席完記者會後,馬蹄露駕車到大埔睇醫生。記者上前求證有關《巾幗 3》意外,留下手尾一事,她直認不諱。

「係!意外當日冇諗到咁大件事,睇咗好耐醫生,因創傷後遺引致焦慮症,要食精神科藥。唔食無論坐同企個身會郁,心跳好快同一受刺激手會痺。」馬蹄露說。

據了解,現時馬蹄露每月花三千多元睇私家醫生,醫藥費昂貴,包袱不輕。

「所以搬返阿媽屋企住,減低開支。不過排咗一年幾街症(政府醫院),終於排到期,亦因為咁,呢一年我要先睇住私家,否則情況會更差。其實依家好番好多,開始減藥,就算開工停藥都可以頂硬上,克服到。好多謝《鐵馬》班同事仲有監製,好體諒我對我好好。」馬蹄露說。

前年她忽以 A貨 Lady Gaga打扮唱歌拍 MV,成網上熱話。

醫咗三年,馬蹄露話昂貴的醫藥費令她面對經濟壓力,不敢停工。

拍《誰家灶頭冇煙火》時,馬蹄露不時類風濕發作,但她靠意志克服痛楚,無阻演出。

《鬼同你 OT》監製徐正康,欣賞馬蹄露在創傷後遺折騰下仍演得出眾,故提名她角逐女配角。

入大台發展前,一臉稚氣的馬蹄露與關寶慧曾為港台拍劇。

拍《鐵馬》初期,馬蹄露因服精神科藥影響記性, NG多次,但對手吳家樂非常體諒,還安慰她。

估佢唔到

88年入行,原名梁穎顏的馬蹄露,當年憑長命劇《真情》彈出,零緋聞的她被踢爆 95年跟開酒吧的 Victor結婚,數年後離婚。對私人事保持低調的馬蹄露,入行 28年來,原來有不少出乎意料之舉。

唱歌入行

做戲出位,但馬蹄露其實憑歌唱比賽入行, 88年參加新秀落敗,被鄭丹瑞睇中薦入商台,由於聲線溫柔,被安排跟「馬路天使」葛民輝合作報導交通消息,並配合改名馬蹄露做電台節目,之後更有機會在王牌廣播劇《十八樓 C座》演出,知名度不斷提升。

奪最乞人憎獎

離開商台後, 96年由曾志偉穿針引線入無綫,馬蹄露隨即被安排在《真情》飾演超級乞人憎、見高拜見低踩的「 May May」一角, 97年無綫台慶頒獎禮,更特設「最厭惡角色獎」,馬蹄露大熱勝出,不過此獎項就只此一屆。

考調酒師牌

《真情》後再演出《皆大歡喜》等處境劇,以生鬼演技見稱,近年演出《愛•回家》,為求做到調酒師角色神緒,馬蹄露自動波去學花式調酒、拋樽,並考獲調酒師證書。考牌考出癮的她,雖然會暈車浪暈船浪,卻自我挑戰,潛水牌、電單車牌,考齊!

周街俾錢婆婆

馬蹄露飾演的角色永不討好,但現實生活中卻另一回事,年前就被網民發現在大埔住所附近,好心給了一百蚊及買飯給一個執紙皮過活的婆婆,得網民激讚。

撰文、攝影、攝錄:娛樂組


鍾意就快D Share啦!