探熱針
反面解約失靠山 月孭廿萬 羅霖賣底褲
與劉坤銘離婚三年的羅霖，早前自爆收到前夫律師信通知，只會負責三個兒子三分之一的學費，為肩負兩個仔的大學支出和幼子生活費，羅霖連自己個樣都賣埋，在網上推出人形攬枕、底褲、杯碟等，賺多一蚊得一蚊。
要搏命搵，羅霖更因為想爭取自由接 job，上月和合作只有半年的經理人公司反面，雙方解約收場。前夫不負責任，羅霖只好靠自己，頂硬上。
唔想俾公司抽佣
羅霖去年七月宣布加盟「理想天映」出任娛樂總監，公布連串鴻圖大計，包括越級挑戰製作演唱會、開拍微電影、出唱片做歌星，公司又投資過百萬為她影寫真集，成功打造她為「美魔女」，點知合作未有一年，上月雙方反晒面。
「羅霖要成間公司上下都專注做佢一個，又當自己係老闆娘乜都要自己話事，但公司仲有其他 project例如做演唱會搞騷，佢就投訴公司冇出力幫佢搵 job，好多嘢都係靠佢自己跑返嚟，話公司冇做過啲乜，點解仲要抽佣！公司幕後大老闆係『拉鏈大王』熊宏海，佢哋兩個其實好熟，唔想搞到朋友都冇得做，已經無條件同羅霖解約。」知情者說。
前夫諗縮數
一二年，羅霖宣布與劉坤銘結束十六年婚姻關係時，雙方一度為兒子撫養權及贍養費公開互數，據知，孭住沉重包袱的羅霖最近又為幾個仔的學費和生活費而煩惱。
「佢一個女人其實都撐得好辛苦！之前講好羅霖負責三個仔嘅生活費，前夫就負責三個仔學費，但依家對方話只可以出到三分一或三分二；大仔 Nathan喺美國讀緊書，二仔 Jordan亦就快要去美國升學，仲有細仔嘅學費，九龍塘又一居單位每個月五萬元租，加埋工人、水電同其他雜項，每個月平均支出要成廿萬，而家要分擔三個仔嘅學費，百上加斤。」知情者說。
有月薪有花紅
撐住頭家唔容易，失婚羅霖從不放過任何吸金機會。去年她加入酒業集團「馬伯樂」任董事，另外又兼任「創健生物醫療集團」股東，每月有糧出有花紅，財來有方！
上星期六（一月二十三日），羅霖以董事及代言人身份，出席「馬伯樂」酒業集團於澳門的活動，主人家一樣的她，見到任何男士都冇放過，積極派咭片、主動搭訕，更不介意做人肉紙板，和在場不同賓客合照。
為賺錢生活，何止攬枕、底褲，羅霖 sell乜都得。
美魔女系列底褲
本刊近日在網上發現個網址，進入網站會看到「美魔女系列 Candy Lo Timeless」的產品，除了日用品如杯、碟、衞衣、手提電話機殼、拖鞋及 BB衫外，仲有印上羅霖大頭樣的咕𠱸及羅霖瞓在床上的攬枕，唔使三百蚊就可以帶佢返屋企攬，另外更有兩款印有羅霖英文名 Candy Lo Timeless字樣的女人底褲，唔想攬住羅霖，都可以著住印有佢個名的底褲，可惜只有女裝，冇男裝。
撰文、攝影、攝錄：娛樂組
|
鍾意就快D Share啦！
|
|
|
