熱爆娛樂: 操到躁　 2個月減 20磅　腰圍縮水　 51歲邵仲衡操到發脾氣 [FACE

2016年1月27日星期三

操到躁　 2個月減 20磅　腰圍縮水　 51歲邵仲衡操到發脾氣 [FACE - 453] __,邵仲衡,MF,

King落場親自教，大佬孝舉起啞鈴時都落足力，一對麒麟臂開始現形。

真面目

操到躁　 2個月減 20磅　腰圍縮水　 51歲邵仲衡操到發脾氣

張家輝創下爆肌史後，娛圈跟手掀起一股操肌熱潮，好似方力申同張繼聰，日夜狂做 gym操出 fit爆身形。

勢估唔到，年過 50嘅大佬孝邵仲衡都話要做「肌佬」。為配合舞台劇呂布角色要求，邵仲衡已秘密操肌 2個月，加上戒油鹽糖，最終成功搣甩 20磅肥膏，一對麒麟臂開始現形。不過有苦自己知，操肌期間，邵仲衡試過操到忟、操到發脾氣，「有時頂唔順咪衝入茶餐廳食碗牛腩麵囉！」

對 51歲嘅大佬孝嚟講，操肌減肥真係一大考驗，所以搵嚟有自家健身室嘅阿 King趙勁皓幫手，邵仲衡話︰「一個禮拜操 2次，每次一個鐘，冇嚟嗰幾日會喺屋企跑步或舉下啞鈴！最初操完返到屋企攰得好緊要，𠵱家返去坐 1-2個鐘，乜事都冇，夜晚仲可以做下掌上壓、做下 sit-up。好多嘢都係操出嚟，自己好似撻番着咁！」

大佬孝未減磅前，個樣圓碌碌，仲有個大肚腩。《蘋果日報》圖片

為配合舞台劇《火鳳燎原之亂世英雄》呂布一角，大佬孝搣走 20磅肥膏，睇落個樣仲後生咗。（網上圖片）

大佬孝現正忙於拍攝「 ViuTV」新劇《瑪嘉烈與大衞》，同黃心美有較多對手戲。《蘋果日報》圖片

衝入茶記食牛腩麵

大佬孝更依足餐單進食，「餐單由 Don（其中一名教練）負責！自己跟到足㗎！譬如雪藏雞柳，當然唔會好似佢哋咁乖攞去烚我會煎下佢，落啲調味料，我唔係好贊成人哋減磅，見到好多同行，食藥減到乾晒，睇到唔健康咁瘦，其實好傷啲肝、腎、胰臟！」 King亦大讚大佬孝四肢成果最明顯。

操肌有成果，大佬孝搣走 20磅肥膏：「大陸返嚟嗰陣 2百幾磅，𠵱家 184磅，腰圍由 34吋減到 32吋！不過，如果你唔食糖鹽，我覺得脾氣容易忟，好多嘢諗埋一邊，諗嘢會好偏激！我都有少少！有時頂唔順咪衝入茶餐廳食碗牛腩麵，真係會忍唔住，好狼㗎！」減咗 20磅肥膏，雖然大佬孝仍未爆肌，但麒麟臂開始現形，大肚腩仲唔見埋添！