Supper Ｍ oment今年攞晒獎，但 4位覺得同成功仲爭好遠， Sunny：「我哋最希望走 tour，呢刻仲爭好遠。」
爆 Like王
捱十年掃勻組合獎 Supper Moment：離成功仲好遠
成立了 10年的 Supper Moment喺剛過的頒獎禮上掃了不少組合金獎，人哋話「巧威威」，但主音陳仕燊 Sunny覺得同成功仲爭好遠，他說：「攞獎當然開心，但我哋目標唔係放喺攞獎，而係希望走到 tour，𠵱家我哋仲未掂！距離仲有好遠。」
香港樂壇即係娛樂圈， Supper Moment自言唔識玩， Sunny：「音樂先係我哋重點，甚至乎大家可以唔使認得我哋 4個嗰樣，淨係聽我哋啲歌就得，呢樣緊要過所謂嘅曝光率。」
F：《 FACE》 S： Supper Moment
F：攞咗叱咤同港台樂隊組合金獎，有冇覺得終於成功？
新碟《 The Moment》上週六（ 23日）推出，以一張全家福合照作為封面， Sunny：「一直都想有張幫過 Supper Moment嘅所有人嚟張大合照。好啱呢隻碟嘅意念 the moment。」
S：站喺我哋 4個眼中，其實我哋唔算係好成功，我哋希望走到 tour，將自己音樂帶到世界唔同地方，但𠵱家真係仲未搞得掂，我哋認為距離仲有好遠。獎項當然對我哋有幫助，但我哋目標唔係放呢度。譬如話觸執毛、 KING LY CHEE，佢哋去到歐洲巡迴演唱，成功過我哋好多。
我諗我哋𠵱家生活到嘅，去到好富貴真係未係，仲有好遠距離，我哋唔使冇飯開囉，過咗戶口零蚊嗰個階段，俾到家用啦，我哋 4個都試過零蚊，但亦都慶幸有呢個時間，會令你知道點生活，人越餓，就越會有動力，知道點做好一件事。
F： Supper Moment好似唔想貼近娛樂版？
S：我哋冇刻意去避，但我哋唔係好識答問題，因為我哋講嚟講去都係音樂，答案真係好悶，慢慢就好似越嚟越少娛樂版記者問咁，其實都係答問題啫，反而重點係我哋嘅音樂，甚至乎大家可以唔使認得我哋 4個嗰樣，淨係聽我哋啲歌就得，呢樣緊要過所謂嘅曝光率，而曝光率就係講緊係音樂曝光率，唔係以我哋面口去曝光。
F：會唔會特登出國語歌攻大陸市場？
S：其實我哋由第一隻碟都有寫國語歌，但絕對唔係要迎合市場，因為寫第一句已經係國語，或者嗰輪聽得多蔡健雅啫！我哋嘅語言能力最好都係廣東話，我想表達自己嘅感受，當然會揀呢個語言啦，上年去過台灣工作，因為當地有公司好欣賞我哋〈無盡〉呢首歌，佢哋好多聽〈無盡〉都會喊，咁即係證明廣東話冇問題， BIGBANG嚟香港唔會唱廣東話㗎嘛！
F： MR.曾經因為參加維穩騷被插，如果有單位揾你哋會點做？
S：如果一啲自己覺得都有問題嘅嘢，咁我哋當然唔會做太有政治立場嘅騷我哋都唔會去做，而且我覺得太多資訊都喺唔同渠道得到，係需要思考同消化。我哋鼓吹緊獨立思考，事件唔係咁單一，可以軒然大波，我哋有時都會懷疑自己咁睇啱唔啱？我哋 4個唔係政治專家，所以我哋唔想用我哋政治觀，影響咗聽我哋嘅歌嘅人。
F：如果梁振英走埋嚟合照，你哋會點做？
S：我覺得問題唔在於影相，影相係冇問題，即係如果有個人隻腳係臭到離遠都聞到，佢埋嚟影相都避啦，嗰件事（同家強合照）問題在於公關手法，我自己睇唔係一件好大嘅事，其實係娛樂新聞嚟啫。
F：點睇「洗腦歌」或者 K歌？
S：其實我哋啲歌都可以喺卡拉 OK唱㗎，好多人認為好「 K」嘅歌，其實入面嘅編曲都係好勁㗎，好似 Cookies嗰首〈心急人上〉，呢首歌嘅音樂底，其實超級難，我哋做樂手，其實都彈唔番，或者打鼓打唔到出嚟，但外界人可能覺呢首係兒歌或者舞曲咁。又或者好多人鬧啲人歌手上《我是歌手》玩颷高音，我哋唔會參加，但反而會好欣賞佢哋製作要 full band演出，希望樂迷可以透徹啲，唔好成日只睇到大家討論嗰一點，而將所有嘢完全忽略。
攝影：林迅景
|
鍾意就快D Share啦！
|
|
|