李蘊上年同內地金融才俊羅章冠註冊，今年年頭去男家家鄉海南補擺喜酒，早前已被本報爆佢陀猴B，不過當時未夠三個月，李蘊只係暗示有咗，噚晚佢終於喺Instagram宣佈有咗5個幾月，更貼出佢同姊妹G.E.M.及超蓮嘅三人合照，稱G.E.M.同超蓮係BB嘅靚契媽!啱啱宣佈懷孕5個幾月嘅李蘊，今日以嘉賓身份出席將軍澳中心嘅賀年活動，係承認有咗之後，首次出騷，身穿白色連身裙嘅李蘊肚凸凸，攞揮春影相，又現場整湯圓，見李蘊出入都有助手扶住，相當謹慎小心。李蘊就話自己個肚腩大咗，問到佢榮升羅太，又有咗BB，有咩唔同？李蘊話：「好特別，平時一個人上台，o依家兩個人，我同佢講咁細個就出嚟做嘢。」李蘊又話向來習慣早睡早起，o依家仲會瞓晏覺，至於，飲食有所唔同？佢表示：「少少戒口，清淡、唔辣、唔濃就OK。」李蘊接受訪問指，目前陀B二十一週，預產期5月尾，已決定喺香港生B，不過就唔講今胎生仔定女，佢直言：「我唔止生一個，希望最少兩個，生三個都ok!因為自己想30歲前，完成結婚生BB，目前24歲，就嚟25歲，睇吓可以完成幾多。」佢仲笑言一班好朋友爭住認係BB嘅契媽。
來源 source: http://hk.apple.nextmedia.com
|
鍾意就快D Share啦！
|
|
|