熱爆娛樂: 唔忿氣　《公公出宮》群組互呻　黎耀祥蝕做炮灰 [FACE

2016年2月17日星期三

唔忿氣　《公公出宮》群組互呻　黎耀祥蝕做炮灰 [FACE - 456] __,黎耀祥,MF,

祥仔一向少說話多做事，但今次一套劇變咗倉底，一套預攞獎嘅劇就喺炮灰檔播映，真係有苦自己知。

真面目

唔忿氣　《公公出宮》群組互呻　黎耀祥蝕做炮灰

馬國明都曾經講過，「𠵱家廿六、七點好×高！」，就知大台收視每況愈下係事實啦，農曆新年梗係傳統炮灰檔期，師奶拜年又賭錢，邊得閒睇劇呀？

偏偏極高層就唔係咁諗，諗住打破常規嚟自 high，於是將原先拍好用嚟做賀歲劇嘅《財神駕到》抽起，揾嚟《警犬巴打》同《公公出宮》，諗住用黃宗澤、鍾嘉欣、黎耀祥、蕭正楠等造起個市，據知高層此舉令祥仔好唔開心，一來拍咗嘅《財》劇永不超生，而《公公出宮》諗住用嚟爭視帝，結果就去咗炮灰檔期，搞到祥仔要喺 WhatsApp群組吐苦水！而事實《公公》首集得 19點，《警犬》首集得 21點，又要請小鳳姐喇！

農曆新年大台收視慣性低，師奶新年咁忙邊有時間開電視，大台亦年年準備定賀年劇，充斥下場面，上年就揾咗師奶最愛嘅黎耀祥孭飛拍咗套 15集嘅《財神駕到》，本來諗住攝下期，收視都冇咩期望。點知有極高層無啦啦想破格，覺得賀歲檔期唔一定低嘅，於是失驚無神抽起套《財神駕到》，仲想造起個市，揾嚟《警犬巴打》和《公公出宮》兩套皇牌劇集谷收視。

黃宗澤和鍾嘉欣 12年合作《護花危情》平均收視 31點，最高 37點，今次新劇《警犬巴打》被安排農曆年檔期，真係唔知救唔救到收視。（網上圖片）

黎耀祥對上一次攞視帝係 12年，憑《大太監》攞，今次原班人馬拍《公公出宮》，梗係想添食啦，點知落入炮灰檔。《蘋果日報》圖片

極高層之一無綫執行董事及集團總經理李寶安，希望打破農曆年收視低嘅慣例，改播《警犬巴打》和《公公出宮》，惟有讚佢破格啦。《蘋果日報》圖片

據知黃宗澤對《警犬巴打》被放喺賀歲檔期播都唔開心，但近年密密拍大陸劇賺錢，已經對大台劇不感興趣。

祥仔好唔開心

據知呢個調動，令一直任勞任怨嘅黎耀祥好唔開心，因為用兩個月時間拍嘅《財神駕到》冇得出街，連埋之前套《巾幗梟雄之諜血長天》，搞到堂堂視帝有兩套倉底劇；而《公公出宮》班底又勁，祥仔諗住年尾再衝擊視帝，套劇放咗呢個檔期肯定冇機會攞獎。

祥仔有寃冇路訴，惟有喺 WhatsApp群組同一眾《公》劇小生，蕭正楠、陳國邦、曹永廉呻爆，話好唔明公司點解有呢個做法，不過冇人夠膽炮轟公司；而另一邊廂，同樣被安排炮灰檔期嘅就有黃宗澤、鍾嘉欣孭飛嘅《警犬巴打》。而極高層就安慰佢哋話套劇好睇，放喺邊個時段都一樣得！係呀！你套劇好睇咪得囉！《大時代》放深夜 12點都一樣高收，可惜你唔係囉！