娛樂偵訊
黃紫盈闖巴西 踩奧運場地
前無綫新聞主播，有「淚的小花」之稱的黃紫盈雖然已離開前線，但新聞觸覺不減，早前孖住朋友行勻五大洲的她，更特登停站巴西，直擊被指未夠班舉行 2016年奧林匹克的奧運場地，比大台跑得更快更前。
九成完工
離開無綫後，偶然在有線及 now做主持的黃紫盈，周圍飛去旅行。一月中開始，她更遊遍五大洲，其中一站是巴西的里約熱內盧，雖已半隻腳踏出前線但黃紫盈職業病發，去到當地，直踩被指有機會爛尾的奧運會場地。
「之前巴西搞世界盃，選手村已經引起過爭議，我覺得其實有唔少人會有誤解，以為嗰度危險同污糟，但我自己嘅印象就唔錯，服務水平好，啲人好陽光又有笑容。我去到會場先申請證件，一申請就批准，所以我相信一般人都可以隨時入去參觀。去到奧運場館，已經完成咗九成，好多設施都進行緊測試；不過為安全計，當局都要求我哋戴安全帽入去參觀。
「我睇嘅劍擊場館係最早落成，當時搞緊模擬比賽，亦有啲外國傳媒喺度參觀。至於被投訴設施未夠完善嘅泳池就仲整緊。今次巴西政府用咗咁多錢去搞奧運，好多設施之後會搬去另一啲城市，等其他居民都有機會享用。」黃紫盈說。
售賣選手村
至於提供給選手入住的 Pure Island仍在趕工中，不過由於奧運會結束後，選手村會開放售賣給大眾市民，為怕多人參觀遭到不必要損壞，所以只能遠觀外貌。
「睇選手村好似去咗睇示範單位咁，當地政府起咗一條鐵路連接選手村同機場，半粒鐘已經到，都算幾方便。因為 Pure Island喺奧運會結束後會賣出去，所以現場有地產經紀負責講解，其實選手村大概分三種面積，由六百幾呎到過千呎，最貴都係大概三百幾萬，我最鍾意都係有露台嘅單位，因為連埋廚房，可以喺度燒烤。」黃紫盈說。
獲贈《星空聯盟》環球特惠套票的黃紫盈，由多倫多出發，先去南美洲的阿根廷及巴西，然後再飛開普敦、德國和新加坡，免費去勻五大洲。
「我喺巴西仲玩咗滑翔傘，只係 train咗十分鐘，就跟住教練，膽粗粗由山上滑落地面，好刺激！後來先發現保險唔包，我就係嗰啲唔驚死嘅人，咩都敢試，嚟緊我計劃去冰島睇北極光，但又驚破壞生態，所以仲考慮緊。」黃紫盈說。
撰文、攝影、攝錄：娛樂組
|
鍾意就快D Share啦！
|
|
|