一直唔願做的關淑怡，三年前開騷一樣幾經波折，幸好唱得跳得，贏番口碑。
探熱針
最平飛都唔爆 關淑怡大件事
一時話退出，一時又復出的關淑怡，打鑼四月在紅館搞入行 25周年演唱會，不過，作風神化的她早已嚇怕投資者，努力半年都搵唔到贊助，最終經理人 Marianne周圍拍門，搵來十多個單位合作，演唱會才得以成事。不過，門票開賣至今，銷情慘淡，連最平的門票都唔滿，大件事！
反反覆覆
八九年憑《難得有情人》走紅的關淑怡，原本計劃去年舉行二十五周年演唱會，拖到今年才成事，全因當事人反反覆覆，話唱又話唔唱，三心兩意，搞到經理人 Marianne冇晒符。
「其實 Marianne都係以朋友性質幫佢，兩年前已經同 Shirley（關淑怡）傾搞二十五周年演唱會， Shirley有咁多經典金曲，可以做得好好， Marianne好落力，想幫佢搞得好好睇睇。本來都傾得七七八八，點知 Shirley忽然又嚟料話唔做，仲話要對住咁多人好煩，跟住失驚無神喺 ig話退出， Marianne都冇佢辦法，惟有俾時間佢冷靜吓再算。」關淑怡身邊人說。
坐食山崩
不過，坐食山崩，存款降到危險線，關淑怡去年終於主動翻兜 Marianne，並希望藉住舉行演唱會撲水，供十五歲兒子關浚賢到美國讀書。
「之前 Shirley鬧走公司個女助手，但 Marianne仲係好體諒佢，繼續幫手傾咗啲外地騷幫佢搵錢，但 Shirley份人太無定向風，應承你話做，約好晒啲嘢，都可以突然唔見人。呢幾年佢真係冇乜嘢做，一個家庭個個月有開支，加上想送個仔去美國讀書，無錢點成事！舊年八月， Shirley搵 Marianne幫佢，仲拍晒心口話今次唔會再失蹤，會俾心機做。 Marianne心軟，又再落疊！不過，好多客聽到 Shirley個名都怕，搞足半年，都冇客肯做贊助。」
一度停機
本性難移！今年一月，關淑怡埋位為演唱會影海報，但其間又鬧情緒，投訴套衫太性感，搞到要一度停機。
「 Shirley啲脾氣好難捉摸，好起上嚟乜都得，但嗰日去到現場，忽然又話套衫太性感，其間仲匿咗入化妝間，粒幾鐘都唔肯返出嚟，要大家係咁氹，佢先肯影埋落去。」知情者說。
慧嫻稍勝憶蓮
由學生年代，已經視對方為假想敵的林憶蓮、陳慧嫻，鬥足三十幾年仲鬥緊，嚟緊三月一先一後舉行演唱會，門票開售以來，慧嫻四場演唱會全爆，相反，憶蓮仲有唔少飛賣。
撰文、攝影、攝錄：娛樂組
|
鍾意就快D Share啦！
|
|
|