嘉欣 BB的婚紗約三萬多元，精打細算的她一於著足全晚，連晚裝都冇預備，呢個老婆夠慳家。
探熱針
唔造晚裝 自製回禮餅 鍾嘉欣全慳宴
31歲的鍾嘉欣，與拍拖十個月的無綫前主席梁乃鵬姪兒、 44歲的脊醫 Jeremy Leung，去年 12月於溫哥華秘密註冊結婚並火速雙喜臨門，本週日（溫哥華時間 2月 27日）二人正式補辦婚宴。向來慳儉的嘉欣 BB，一反花旦出嫁的大派頭，婚禮慳住搞，布置簡潔，溫馨搭夠！更有傳處女黨姊妹團自費飛加送嫁，而婚宴當晚，新娘冇預晚裝，連回禮餅亦自己做埋包裝，全慳宴！
拒俾錢搵人搞
脊醫老公 Jeremy年搵百萬加幣，住的是值千萬港幣豪宅，有條件做闊太的鍾嘉欣卻不改慳家本色。
過往花旦出嫁，十居其九豪使，但嘉欣 BB例外！據悉， Jeremy原本想為老婆打造一個浪漫婚宴，搵 wedding planner大搞，至於婚宴場地，則鎖定了位於溫哥華西區的 Arbutus Club，這個私人會所單是入會費，已需加幣五萬五千元另加稅（約三十一萬港元），但鍾嘉欣為慳住老公荷包，拒絕用 wedding planner，寧願辛苦啲，自己嚟。
一件婚衫頂全晚
鍾嘉欣知慳識儉，婚宴講求實而不華。場內以白色及粉紅色為主調，布置簡單，拍照主景得一個。新娘出門穿的裙褂，亦非動輒十幾二十萬的金銀線褂王，而是只需四萬蚊有交易的龍鳳潮褂，襯尖沙咀百利商場三百多元蝴蝶繡花鞋。
行頭方面，嘉欣 BB更加抗拒炫富，龍鳳鈪一對就夠！一卡求婚鑽戒，一對新人的婚戒款式亦相當普通；新娘全晚著住三萬多元的婚紗冇換過晚裝。由頭到尾都冇刻意用金錢堆砌，嘉欣 BB先做得到！
閃石回禮盒自己黐
搞婚禮樣樣都係錢！據悉，送給賓客的回禮，正是婚宴前夕被傳媒影到鍾嘉欣家姐 Annie，去男家時手上捧住的幾盒「馬卡龍」。鍾嘉欣為慳人工錢，親手為回禮做包裝，連放「馬卡龍」小禮盒上的閃石，都是由慳家梁太親手逐粒黐。至於婚宴菜單頭盤是帶子沙律，主菜有牛扒或魚，配以甜品，十分平民化。
新娘在婚宴當日接受訪問說：「籌備一個婚禮真係好攰，要顧好多嘢，由講稿、食物、 rundown、揀邊一種酒、布置同坐位都要好 detail，原來少一盞同多一盞燈又唔同價錢。」
據悉無綫曾打算抽水，提出獨家包拍，並提供 TVB自家梳、化，但遭鍾嘉欣拒絕。
「 TVB話要將婚宴包起嚟拍，但為咗控制場面，唔可以俾人影相，但男家堅持一定要自己人拍，所以最後大台只係喺婚宴開始拍場內環境同做訪問。當日婚禮布置同大會攝影，都係 Jeremy啲朋友搞。」知情者說。
慳埋有四間屋
入行十年做到當家花旦，鍾嘉欣一直是慳妹，慳埋慳埋， 06年如願做業主，以近 200萬買入將軍澳新都城單位，之後 11年再於同一屋苑買下另一大單位， 550萬一炮過俾，冇按揭慳番俾息。此外，嘉欣 BB在溫哥華有兩間屋，四個物業加埋共約值 3,600萬。小富由儉的典型鍾嘉欣，平日出街搭地鐵巴士，自稱買名牌靚袋會內疚，多年來大部分時間著客戶贊助服裝；出埠拍劇，不會要求住好亦肯同人孖房，絕不會補差價住單人房。仲有，放假返溫哥華只搭經濟客位，搏航空公司 upgrade，總之慳得就慳。
出神入化
鍾嘉欣的婚宴，毫不奢華，盡顯當事人實際不浮誇作風。圈中亦有唔少「慳妹」，同樣慳到出神入化，各有特色。
楊思琦 慳到出汁
同鍾嘉欣好老友的楊思琦同樣慳到出汁！開鏡拜神燒肉唔嘥打包走、九龍城買平衫，亦唔怕人笑經常一身贊助卡通衫出現。慳埋慳埋去買樓，至今手上持有三個市值共超過 3,000萬的物業，包括長沙灣泓景臺、清水灣半島及將軍澳天晉！
撰文、攝影、攝錄：娛樂組
|
鍾意就快D Share啦！
|
|
|