黃伊汶(Emme)2014年同演員陳國坤結婚，2015年10月宣佈有咗三個月，黃伊汶今午2點就同老公陳國坤行出養和出院，陳國坤呢個廿四孝老竇，成程抱住個仔仔，伊汶出嚟時叫：「好熱!好熱!」伊汶精神好好，身材亦都好fit，好似佢老公話齋伊汶身材好到好似冇生過BB咁。伊汶做訪問嗰陣，叫老公陳國坤同BB先上七人車，BB仔對眼就有啲似爸爸陳國坤，個鼻仔就似足伊汶，夠晒鼻高高，個樣都幾可愛，難怪陳國坤抱住囝囝，都不時揭塊布，見吓囝囝個樣。佢表示：「第一日個傷口仲係好痛，第二、三日已經冇咁痛，醫生話可以出院。」伊汶又話最開心係佢媽咪同老爺奶奶，成日叫佢哋快啲帶孫仔返屋企，佢續道︰「今日可以出院，帶佢出去見下屋企人。」講到BB早咗兩個月出世，搞到老公要喺大陸趕返嚟，佢解釋：「係呀!本來小龍(老公)唔想上大陸做宣傳，不過我同佢講唔會咁準，你照上去做，你都係上去一日，點知撞正嗰日好無奈，個仔整蠱佢，出世喇!」伊汶稱早上陣痛，要開刀生B，BB都好健康，亦都有7磅幾足磅，希望佢健健康康，問囝囝個樣似邊個，伊汶笑言：「上半part就似老公，下半截就似我!不過日日都唔同，日日都變緊。」伊汶又話o依家又有餵奶粉同人奶，佢指餵人奶都辛苦，如果自己堅持唔到餵人奶，自己都唔會勉強，當「補品」俾佢食，佢都有讚囝囝好乖，但係囝囝好大食。伊汶話囝囝英文名未諗，中文名都係「陳真」，返去睇吓有冇其他同音字代替「真」，個名叫「陳真」係由老公諗，因為佢想囝囝做人真啲，呢個年代見好多人都好假，當初一改就係呢個名。另外，伊汶笑言公司啲同事鎖咗公司門唔俾佢返工，最快都要4月先開工!
|
鍾意就快D Share啦！
|
|
|