| next 1/1 pre | |
呢幾個月股市係咁冧，恒指曾跌穿萬九點，點知上星期尾又升番，大家又開始諗是否「真‧好轉」？好、淡友間衝突即刻激化，呢邊做緊好倉，嗰邊夾淡倉，絕對唔係你死就我亡，難免多咗唔少對頭人。點搞？連班股壇口痕友都話，唔爭在出動埋千年民間智慧，趁明日(3月5日)係驚蟄，約埋去灣仔鵝頸橋「打小人」。
其實講到「小人」，職場向來都唔少，以下10種Office毒人，就要認實佢哋、遠離佢哋，咁就可以慳番，唔使幫襯鵝頸橋。
==========
1、是非型
正所謂「大智論道，中智論事，小智論人」，是非精最鐘意將快樂建築係人哋嘅痛苦上，屬「小人」榜首。講是非，無聊兼傷人。世間上有好多正面嘢值得發堀，唔好浪費時間喺是非之上。
-------
2、「催狂魔」型
睇過《哈利波特》都知，催狂魔(Dementor)一出現，人就至剩下最恐怖嘅回憶。催狂魔即係嗰啲只係得悲觀同悲觀同悲觀嘅人，佢哋嘅負面氣場犀利到，有佢哋在場，可以搞到成間房都生無可戀。
--------
3、乜都唔抵得型
呢類人，有咩都唔抵得人，總之就係「隔離飯香」，硬是覺得人哋有嘅一定好過自己。接近得多，分分鐘畀佢哋傳染埋睇小自己兼妒忌人嘅惡習。
--------
4、老脾型
老脾怪完全冇控制情緒能力。佢哋向你發脾氣，仲要賴咁燥都係因為你。唔好再畀佢哋當你係情緒廁所，乜都發洩落你度。
--------
5、林黛玉型
開始時，你只不過覺得佢哋慘，但慢慢你會發覺佢哋原來係無病嘅「長期病患者」，少少嘢都會Call你出嚟呻、搵你陪。佢哋唔會視困難為成長嘅機會，只係一味自怨自艾。
--------
6、操縱型
佢哋至叻打住Friend牌嚟吸光你啲精力與時間，另一方面又因為清楚你嘅喜好，好識氹住你、吊住你條命仔。不過，若細心睇，會發現佢不斷喺你身上攞佢要嘅嘢，但就好少甚至零付出，小心最終有一日佢會食咗你。
--------
7、左彈右彈型
佢哋最叻就係彈你鍾意或你認為啱嘅嘢，仲要彈到一棟都冇。佢哋覺得世上只有自己先係正宗，所有同佢哋唔同嘅人與事，一概睇唔起。
--------
8、自我中心型
呢類人一般朋友唔多個，與人有距離，唔易親近。若你發現識咗呢位仁兄之後，社交圈子愈嚟愈細，好似得番你同佢相依為命咁？擺明你中咗伏，分分鐘連你都只不過係佢用嚟增加自信嘅工具。
--------
9、寸咀型
同佢哋溝通？絕對係浪費時間，事關佢哋對任何嘢都視為係挑戰緊佢。佢哋寸咀兼傲慢，周時同人鬧意見。
--------
10、黑心型
簡單講就係「黑心」兩個字。佢哋嘅快樂建築喺你嘅痛苦上，唔係Hurt你就係想攞你着數，就係咁多。除此之外對你零興趣，總之就冇好嘢。不過好處係，一眼就認得出佢哋。
|
鍾意就快D Share啦！
|
|
|