11/3
本月 11日，林雅詩單拖現身浸會醫院，原來為探入院做開腦手術嘅老公溫文英。
真面目
反晒面 老公生癌後腦開刀 林雅詩冷淡：入院前先知！
去年正式復出的林雅詩，經歷過與老公多次嗌交、自殘兼老公偷食被影斷正後，月前已正式入紙申請與結婚 10年的捲閘太子溫文英離婚，近月努力登台接 job，實行靠自己養起囝囝。
本月 11日林雅詩突然現身浸會醫院，原來係探離婚中的老公溫文英。據知溫文英入院做開腦手術，手術前還叮囑林雅詩要帶囝囝嚟探病，難得一家三口可以聚聚，點知囝囝坐未夠 15分鐘已經嗌走。似乎林雅詩真係好心淡喎！
雖然林雅詩和溫文英夫妻關係惡劣，去年 11月老公又偷食斷正，始終 10年夫妻關係，溫文英於月前發現後腦有腫瘤，加上頭痛次數越來越密，最終安排入院切除腫瘤做化驗，林雅詩在本月 11日亦有抽空探望。
「唔想佢有事」
據知多月無見過囝囝的溫文英曾要求林雅詩帶埋阿仔到醫院探病，林雅詩翌日便帶埋囝囝去見前夫，點知囝囝坐一陣已經嗌住走。「嗰日林雅詩拖住個仔入嚟，可能係公眾人物啦，嚟到都即刻拉簾。對話唔多，聽到個男人叫個囝俾心機讀書，要聽話，不過阿仔應該掛住打機，淨係答『唔』，坐都未夠 15分鐘已經同阿媽講要走。」
上週五（ 18日），林雅詩在西貢寓所外接受訪問，初時都對老公入院開腦一事封口，當記者表示知道溫文英狀況時唯有直認。「其實佢入醫院之前嗰日我至知㗎，我嗰日都有唔開心，始終咁多年夫妻，我都唔想佢有咩事。佢做咗手術㗎喇，開咗後面個頭嗰度，做咗手術開咗刀，但真係咩情況我真係未知住。」
「叫我照顧好個仔」
對於囝囝唔多願探溫文英，林雅詩就以醫院多菌作解釋，「仔仔喺醫院唔係好慣，所以有少少扭計，同埋多細菌，所以我覺得差唔多應該要帶佢走。（老公有冇喺病床講啲乜？）叫我照顧好我哋個仔仔。我只係做返我應該做嘅責任去帶仔仔去見佢。（離婚手續仲辦緊？）我呢邊就處理好晒，咁佢嗰邊就應該一啲都未處理嘅。」
單親媽媽搏命做
一早知道男人靠唔住，林雅詩早喺老公溫文英被揭偷食前已做好靠自己準備。雖然仍未搞掂離婚手續，不過林雅詩已經有條件養自己兼養埋囝囝，早前佢仲話會為咗囝囝唔再婚添！
採訪、撰文：娛樂組
攝影：娛樂突發組
|
鍾意就快D Share啦！
|
|
|
