爆 Like王
低俗有市場 粗口好到位 MK仔拍片：少少鹹多多趣嘛
以前好興講呢句：書中自有顏如玉；又有邊個估到原來拍 YouTube片都搵到顏如玉呢？ JFFT可以話係 3位 MK仔，拍片題材可以話市井到不得了，《笑談講粗口》、《毒 L做男朋友一流》之類粗俗得嚟最多人睇，而且竟然成全咗一段姻緣添！
耀祥（ 22歲）（前）
職業：電視台影片編輯
喊出嚟（ 21歲）（後）
職業：裝修工人
湯米（ 21歲）
職業：網上雜誌編輯
JFFT由 3個毒男組成，拍 YouTube片接近 3年，題材市井又搞笑，片量唔多但點擊率 5萬至 50幾萬都有。
F：《 FACE》 J： JFFT
F：你哋拍片嘅題材都好市井，你哋係咪 MK仔？
J：我哋喺比較 MK，同埋週遭接收到嘅資訊同生活環境都影響到我哋，最常流連喺旺角同網吧，亂咁行、睇下戲咁，試過喺網吧 5、 6個鐘，又鍾意睇動漫，唔係主流嗰啲，有大波妹係必須少少鹹，多多趣嘛！粗口平時都講嘅！唔係專登拍嚟吸引人，但無可否認粗口有呢個魔力喺度，加兩個字（粗口）更加到位，引人發笑同埋有親切感，屋企人都有睇我哋啲片，會話：正經啲唔好剩係講粗口但我哋覺得冇乜所謂。
F：點解你哋會拍片？
J：我哋以前讀同一班，都係讀電影電視，又有啲表演慾，所以想用番呢個形式去玩。題材來自生活同來自高登，最近條片《從 AV角度分析好男人》係因為對 AV有啲感受又有啲好男人嘅經驗之前有啲片係俾高登啟發，但我哋唔會將巴打絲打啲嘢照搬，例如唔會佢哋改咗啲歌詞，我哋就攞啲歌詞去改又擺上網搶頭啖湯咁囉！
F：你哋有乜方法宣傳啲片？
J：我哋第一條片係《笑談講粗口》，一出就有十幾萬人睇（現已累積 50萬），當時喺高登「娛樂台」同「創意台」開咗 pose嚟宣傳下，點知有幾百個留言。其實喺拍片之前已喺高登寫咗篇文，可能有啲巴打留意到，有啲留言提議我哋拍出嚟，文字好似唔夠過癮，所以第一條片就用咗呢篇稿嚟拍。
F：幾個毒男拍片係咪為咗識女仔？
J：的確係，「耀祥」個女朋友就係咁認識。耀祥：佢睇咗我哋啲片之後 inbox話我哋啲片好搞笑，然後我哋傾偈，佢每一條片都有留言，我問佢其實想同邊個傾偈多啲，慢慢得番我同佢傾，之後就開始用我自己 facebook同佢傾。（有冇睇佢 fb係咩樣先？）睇勻晒 inbox幾次已經掃緊，仲分析佢啲相有冇 PS過，真人都有八、九成嘅！拍咗差唔多兩年拖喇！（可惜耀祥唔肯公開佢女友樣貌，要保持神秘喎！）
攝影：楊學
|
鍾意就快D Share啦！
|
|
|
