方力申同鄧麗欣嘅十年情喺上個禮拜傳出「分訊」，太陽娛樂更發聲明對外公佈二人情侶關係結束，不過有傳「分訊」聲明早喺一個月前已經寫好，但因為當時小方唔喺香港，Stephy要「等齊人」先公佈。當外界不斷揣測二人分手嘅原因，有知情人士就爆料數出小方三大罪狀，致十年情玩完，包括:1.Stephy已經32歲，身邊嘅好姊妹都相繼成為人妻，點會唔恨嫁，但係小方一直吊兒郎噹，同居多年都冇試過求婚。加上佢哋除咗夾錢買名畫投資之外，從冇買過樓或開公司，小方仲要搬離咗比華利山嘅愛巢返薄扶林同父母同住。2.小方十年嚟唔單止冇求過婚，平時連一啲少驚喜浪漫嘢都冇做過。知情人士話﹕「咪睇小方好似好識冧女仔，其實咁多來佢都冇送過花俾Stephy。」難怪Stephy話﹕「平時冇驚喜已經係驚喜」，就算今年情人節小方做啲嘢送花又出街撐枱腳都冇用。3.小方嗜好多多，平時約朋友去玩仲多過陪女朋友，工作上就只係公司派乜佢做乜；相反Stephy喺事業上有好多追求，又會搞自己嘅時裝品牌，嫌男方唔上進。雖然每次拗撬完後就當冇事發生，但係心入面點都有氣刺，最後感情出現裂縫，二人越行越遠。小方同Stephy分手觸動咗好多人嘅神經，好多人話佢哋係陪住自己長大嘅集體回憶，就算係咁最多都係全城「哀悼」幾日啫，勢估唔到有網民無聊到去美國白宮網站發起聯署，要求「外國勢力」介入，要二人復合。個po由19號開始，截至今日，已經有超過三百人簽署，但啲名字都相當古怪，大量重複而且都係兩個單字。有網民睇唔過眼話﹕「平時自己地頭玩真係無所謂，去到人哋地頭個個叫緊救命，你攞呢啲嘢喺人哋個網玩，你估人地點睇你香港人？下次你真係有難，再上去搵簽名，睇下有無人理你？」有網民反駁話，外國都有唔少人喺白宮網站發起惡搞聯署，例如﹕驅逐Justin Bieber出境並廢除其綠卡，要求用樂隊One Direction的歌曲作為國歌等等。確是相當無聊。其實香港過去亦多次發起白宮聯署(陳雲形容之為「投名狀」)，盼美方關注，包括銅鑼灣書店5名香港負責人及職員被失蹤事件。而早於2014年9月28日佔領期間，警方多次施放催淚彈驅散群眾。當時有身處美國的港人，自發於白宮網站發動聯署，希望美國政府能向中國政府施壓，尊重給予港人真正民主選舉的承諾，若簽署超過10萬，白宮須回應有關訴求。而最近一次發動聯署，就係國師陳雲喺1月發起「停止支持香港版權（修訂）條例草案」聯署，表示「希望美國高抬貴手，不再支援現行的版權修訂條例法案」，白宮一方以違反聯署條款，移除此項聯署，結果不了了之。
|
鍾意就快D Share啦！
|
|
|
