熱爆娛樂: 加國預婚巴打找數　鄭敬基：我一毫子冇出過！ [壹週刊

2016年4月14日星期四

加國預婚巴打找數　鄭敬基：我一毫子冇出過！ [壹週刊 - 1362] __,鄭敬基,M1,

4月 8日晚，鄭敬基與未婚妻 Angie在多倫多搞 pre-wedding party，筵開十一席，在浪漫氣氛下二人情深起舞。

探熱針

加國預婚巴打找數　鄭敬基：我一毫子冇出過！

53歲，又離過婚的鄭敬基，下月再做老襯，娶細 19年的地產女友 Angie。自嘲「又老又冇錢」的他，難得老婆仔唔 mind，更為老公慳一蚊得一蚊親手製作囍帖。老婆抵錫，鄭敬基傾盡友情力量，上週同準新娘及雙方親友，在加拿大舉行一個百分百韓式 pre-wedding trip，讓女友化身韓劇女角。

有個以他為重的老婆，仲有班戥他開心，包起成個 pre-wedding使費的好兄弟，鄭敬基在 party內對另一半情深表白：「你知我包袱有幾大，但你都可以接受。」兩口子感動到攬到實，半百鄭敬基難得有情人。

嘉樂仔做伴郎

鄭敬基半生吊兒郎當，廿年前更因偷食導致離婚。由多倫多回流香港後，亦不停換畫，女友名單不乏圈中人，包括鄧萃雯、鄺文珣。人生下半場，與三十四歲做地產的女友 Angie拍拖半年決定拉埋，女友條件好又體貼，但令鄭敬基決定再娶，是對方冇嫌棄年紀大又冇錢。「本來打算唔擺酒，未婚妻仲話：『我喺教會派餅宣布消息就得。』我更加要逼自己唔可以返轉頭，要對佢一條心，就要公告天下。」鄭敬基說。

好日子是下月七日，一對新人上午先在北角國際神召會堂區行禮簽字，晚上設宴十圍招待至親摯友，伴郎「南山三虎」錢嘉樂走唔甩，他一對廿多歲仔女亦會做戥穿石。

冇錢唔緊要，鄭敬基肯花心思，一樣氹到另一半冧爆。上個禮拜，鄭敬基偕未婚妻飛加拿大，出席佈道會同教友分享，實情是搞 pre-wedding party氹老婆。

時下女性有邊個唔中韓劇毒？鄭敬基為氹老婆，在多倫多影的婚照，走韓劇 feel，唔冧就暈。

Angie貪靚，在零下六度雪景下，僅穿超短旗袍，同老公仔相映成趣。

抄足《浪漫滿屋》

Party於香港時間四月八日晚在多倫多一酒店舉行，出席者包括雙方親友，及鄭敬基當地的「巴打」。

鄭敬基吹雞搞 party，但他竟然一毫子冇俾過，一班朋友負責全部使費兼安排行程，更刻意安排準新娘一嘗做韓劇女角滋味，令也是韓迷的 Angie冧晒。

從 party場內的片段可見，現場氣氛有如韓劇《浪漫滿屋》一樣浪漫；雖然只是預婚派對，但一對新人進場、上台合巹交杯、互餵蛋糕、祝酒等等，過程跟正式婚宴無異。

逾百親友在場見證，鄭敬基感動到不時捉實老婆隻手。

婚宴前，鄭敬基與 Angie在當地先玩兩日，燒槍是女友夢寐以求的節目。

老友安排，二人還坐直升機環島遊。

讚老婆完美

席上，準鄭太公開多謝出錢出力的賓客。

「多謝你哋經常咁幫佢，尤其喺佢孤單時候陪佢飲咖啡，飲到佢咁醒（全場爆笑）。」讚醒目未夠， Angie更當眾表白：「你唔需要成功，唔需要完美，你已經對我好重要，因為你係神為我預備嘅伴侶。」

之後鄭敬基攬住老婆跳舞唱《酒杯敲鋼琴》，又一邊對住老婆唱《為你鍾情》，一邊講：「佢對我真係好包容，佢知我包袱有幾大，但佢全數接受，想話俾大家知，你（老婆）真係接近完美。」二人隨即攬住喊晒。

日前，兩口子在將軍澳飲咖啡，雖然年齡差距十九載，但卻意外激情。

未婚妻挨實鄭敬基，頭貼頭一部電話兩份睇，冇秘密。

一杯啡兩份啜，間中對望甜笑，十足初戀咁款。

一毫子冇俾

鄭敬基接受本刊長途電話訪問時說：「我哋喺呢邊仲影多咗輯新嘅結婚相，影相嗰日得零下六度落緊雪，好凍但好靚。攝影師想有韓劇 feel，就算漫天風雪，都有我撐起另一半，要佢幸福，感覺真係好正。呢個 trip我哋仲坐直升機環島、去睇 NBA同影呢輯相，仲有成個 pre-wedding晚宴啲費用，我真係一分一毫冇出過，全部係朋友嘅心意。」

鄭敬基自認「冇樓冇車」，下月的婚禮亦慳得就慳，但因為朋友多，禮服、婚紗、首飾通通有贊助，而囍帖則是未婚妻親手製作，自己黐黐貼貼，賢內助。