喺上月遠赴英國古堡同羅仲謙秘婚嘅楊怡，終於成功將謙謙私有化。不過由於老公樣靚身材正，為咗「安全感」三個字，楊怡焗住「虎妻」上身，全方位「𥄫實」謙謙！除咗要揸住財政大權，仲向老公落「禁女令」，嚴禁佢有任何「可疑女性」埋身，搞到謙謙有男主角都冇得做！
見劇化水
加入無綫捱足幾年先至上位、做到「男一」嘅謙謙，原本諗住乘勝追擊拍多幾套劇，坐穩當家小生地位，無綫之前仲睇中咗備受港人熱捧嘅韓國人氣劇《Kill Me Heal Me》同《沒關係，是愛情啊》，尤其《Kill》嘅男主角池晟一人分飾七角，更加係極有挑戰性，所以鐵定以該劇做藍本開拍香港版，且搵嚟資深監製潘嘉德操刀。據知，潘嘉德本來諗住搵愛將謙謙同黃智雯孭飛，謙謙亦都對呢套劇極有興趣，可惜最終過唔到老婆嗰關。
謙謙同黃智雯喺2010年拍攝《搜下留情》時傳過緋聞，當時仲未同楊怡拍拖嘅謙謙，仲盛傳好照顧黃智雯。之後佢哋合作《巴不得媽媽…》時更加有感情線，又曾經不約而同咁話大家感情相當好。
勒令謙謙推劇
眼見老公同黃智雯啲緋聞當年傳得咁勁，所以楊怡一知道佢哋有機會「故劍重逢」都好擔心，就算黃智雯已經有感情穩定嘅圈外男友，楊怡都因為唔放心勒令謙謙推劇！為免老婆嬲嬲豬，謙謙亦焗住放棄。
袁偉豪臨危受命
消息指，潘嘉德因為咁樣搞到陣腳大亂，最終搵咗另一位上緊位嘅小生袁偉豪頂替。據知除咗黃智雯，其實蔡思貝都係楊怡高度戒備人物，因為蔡思貝當年被指拍無綫劇集《衝線》時姣溝謙謙，睇嚟謙謙嚟緊嘅「發展空間」，都有啲忟水。
風騷行街多人圍
老公咁聽話，「虎妻」楊怡當然心情大靚啦，所以之前見佢同助手喺紅磡行街時不知幾風騷。而向來對生B採取開放態度嘅佢，面對粉絲同小朋友要求合照亦來者不拒，「母愛爆棚」嘅佢，仲要屈埋膝就小朋友影相，期間仲有粉絲送咗一大紮花畀楊怡。眼見自己搵到好歸宿，人氣婚後又不跌反升，捧住紮花嘅楊怡當然飲得杯落，四萬咁口走去買珍珠奶茶，真係矚目到不得了。
|
鍾意就快D Share啦！
|
|
|
