藝人楊怡到電台接受薛家燕和林盛斌等人的節目訪問，期間薛家燕送上鮮花和雙囍牌，並出口術笑住催楊怡洞房：「掛咗個牌就要洞房，要掛喺床上，望到佢就會諗起洞房，今晚就好掛啦，阿謙（羅仲謙）喺唔喺香港？喺就今晚好掛」林盛斌又叫楊怡記得留意體溫，搞到楊怡不停笑。
婚後想過二人世界
受訪時楊怡則謂不心急生B：「呢樣係隨緣，係天意，唔會刻意，如果有會同大家講。（Ready好生B未？）我Ready有新嘅身份，睇吓點樣照顧好屋企同家人，希望調理好自己，他日如果有小朋友睇吓點樣做好新角色，但生小朋友就冇諗時間。（會唔會掛起個牌？）唔知係咪咁用，薛家燕話傳個牌畀我生小朋友，個牌係幾喜慶，新年啱嘅會掛出嚟，有機會就試吓。（成日畀人問洞房尷唔尷尬？）冇，大家講笑，大家期望，結得婚都預咗生小朋友。（阿謙想唔想生B？）因為我哋年尾擺酒，想完咗呢個儀式先有完整人生計劃，先開始人生另一頁，所以今年唔諗呢樣嘢，同埋結婚後都想有二人世界嘅時間。」
約滿無綫自由身
至於講到跟無綫剛剛約滿，楊怡表示現時是自由身，但不排除會跟無綫有另一方式合作：「始終做咗咁多年，依家自由時間多啲選擇，可以接觸唔同嘅嘢，可能會返內地發展或其他元素嘅嘢，但唔排除會同TVB有另一方式合作，有適合劇本都會接。（拍劇會唔會係呢一年嘅事？）暫時唔會，呢段時間都會做好要處理嘅事，所以呢半年都唔會。」
問到《末代御醫》會否最後一套劇？楊怡笑言：「唔好咁講，咁啱個名啫，其實都係好事，咁啱出街撞正喜事，遲啲都會拍劇，不過產量冇以前咁密，可能一年一、兩套。」
良性競爭係好事
另外，講到疑因為ViuTV開台而搶了《末代御醫》收視，她表示：「我都有睇ViuTV，人係要吸收新事物，我自己套劇都有睇，但唔好講搶收視，呢啲係良性競爭，觀眾多咗選擇機會，有新頻道係百花齊放，係好嘅選擇，所以唔好話搶，大家鍾意睇咩台冇得控制。」
|
鍾意就快D Share啦！
|
|
|