莫皓光，外號「野人」，三十四歲，港大教育系畢業生，本港生態導賞團體「自然脈絡」總幹事。野人生活，衣食住行有數得計：「衣，全部二手貨，好多衫都係啲大學學會衫，啲學生着一、兩次就唔要。」「食，身為素食者自家種菜夠我夏天八成食糧，冬天兩成，我又會盡量用柴火煮食。」「住，我住元朗八鄉二百呎小屋，租金六千（我同老婆一人一半）、電費每月四十蚊，包括夏天開風扇、冬天開暖爐，仲有雪櫃，電腦上網和手提電話，我無電視機，我用山水唔洗交水費。至於屋企用品，我執人哋唔要嘅傢俬、廚具、日用品，清潔沖涼只用清水和環保酵素。」「行，每個月大約四百八十元，有四日要返雞嶺村農場工作，乘巴士每日三十蚊。」「計計埋埋，我一個人只需用四千幾蚊，每星期只工作三、四天，十幾年來無買過一件新衫，家中所有物品都是別人棄掉的二手貨，月入一萬，其實好夠使。」「我無俾家用，因為父母仍然有工作，無經濟壓力，而更多嘅錢唔能夠令佢哋開心。我寧願返少啲工，俾多啲時間陪佢哋，帶佢哋嚟吓郊外，同佢哋傾多啲偈，而唔係用錢去滿足佢哋。我老婆『阿牛』同我係同道中人，當初一齊讀生態環境課程識嘅，我哋拍拖就係一齊打理農務，遊山玩水。」撰文：關卓凌攝影：葉漢華旁述：Wendy＠USTAR
來源 source: http://hk.apple.nextmedia.com
|
鍾意就快D Share啦！
|
|
|