裕美拍短片個樣雖然就喊就喊咁。
藝人裕美親認與丈夫林恩浩婚姻出現問題，更驚爆搞緊離婚，啱啱佢透過社交網上載短片親自解釋事件，仲要素顏戴眼鏡出鏡，個樣有啲憔悴。
曾找婚後輔導
裕美聲線微弱咁話：「我係裕美，知道大家都好關心我依家情況，好多朋友打電話、發短訊問候我。我喺呢度回應大家，之後唔會再回應。2014年年底我同Jason（丈夫林恩浩）發生咗一啲不愉快事件，關係開始破裂，但我哋有去挽救過。我哋有去搵婚後輔導員同牧師傾過，嘗試去挽救感情，但係盡咗力都唔得，都唔能夠Workout，但係一直以嚟其實我都冇乜點同人講過呢件事，因為我驚啲人好擔心我，尤其係我媽媽，因為我媽媽好錫我，所以一直都唔夠膽同佢講。喺呢段日子入面我好多謝身邊好多朋友嘅支持，同埋我教練，佢哋都好擔心我會有Depressed（抑鬱），因為我有Depressed嘅經歷，好多謝佢哋陪我傾偈……」
「我會好好生活落去」
原本以為呢個網上短片訴心聲已經劃上句號，但過咗一陣，裕美再上載第三條片，聲音就繼續係嗚咽嘅：「佢哋好照顧我，喺我有需要時二話不說去幫助我，無論今次呢單新聞有咩回響都好，希望關心我嘅朋友唔使擔心我，我會好好生活落去。希望唔好傷害到身邊嘅人同朋友。事情交待完嘞，我同Jason分開咗一段日子，大家唔使擔心我哋。」
谷唔出眼淚
不過唔知係因為唔識用定點，裕美呢條聲稱最後一次回應嘅片，總共分開咗兩次上。而且佢拍片期間一度想喊想喊咁，又低頭玩弄手指，不過始終都係「想哭但是哭不出來」。另外裕美都有用文字留言：「冷靜一日後，在這裏向大家交代我的情況，由決定自己重新一個生活開始就知道要適應各種困難，但我必須繼續努力工作和照顧媽媽，多謝關心和支持！從此以後我會專心工作，不再回應感情問題。」
來源 source: http://hk.on.cc
|
鍾意就快D Share啦！
|
|
|