緊張老婆健康的阿澤，一有時間就抽空陪阿田睇中醫。
娛樂偵訊
喪母打擊落晒形 杜汶澤督阿田睇中醫
入行已經四分一個世紀的田蕊妮，過檔大台後一直不缺機會， 13年更憑《巨輪》爆上，一劇接一劇坐穩一線花旦位，但今年初撞正媽咪離世，受到極大打擊的阿田，成個落晒形！心情差又要趕工，內外俱傷！
由於 38歲高齡的阿田仍未放棄生 B，故近日無論幾忙都好，杜汶澤都做跟得老公，陪實老婆去睇中醫，調理身體。
扮晒冇事
今年三月，田蕊妮母親因病離世，自此，阿田的心情一直沉底，但貴為無綫首席花旦劇接劇，就算情緒瀕臨崩潰又無法停工，阿田仍強裝冇事，死撐！老公杜汶澤看在眼裡，惟有不停開解。
「阿田媽咪都走咗幾個月，不過佢心情都未平伏，有段時間仲成日匿埋喊，加上要開工，身體差咗好多，食乜都唔吸收；以前開夜佢好捱得，但而家就好容易攰，精神又唔多好，阿澤都好擔心！」知情者說。
拍罷《來自喵喵星的你》後，緊接與鄭嘉穎合作的新劇《迷》，田蕊妮又係孭正，見老婆日夜顛倒落晒形，廿四孝的阿澤惟有督住阿田，陪她睇中醫。
人滿要排隊
早個禮拜，拍完夜班戲，阿田收工回家休息幾個鐘後，杜汶澤便捉了她去銅鑼灣睇中醫。下午兩點幾，藥行已經坐滿等候睇病的病人，阿田坐低排隊，阿澤就坐對面等執藥的位，其間田蕊妮一直講電話，阿澤亦埋頭睇手機，等了唔夠半個鐘，終於輪到田蕊妮把脈。
其間醫師不時叮囑阿田要多爭取時間休息，盡量減少捱夜，診症前後約十五分鐘，兩公婆先離開，轉頭再攞藥。
考慮減產
亞視出身的田蕊妮，○六年過檔無綫後，情況同江美儀一樣，因為好使好用又好戲，成為大台監製熱選，事業出現新裂口，一三年更加攞埋視后，也因此一度令阿田決定延遲生 B計劃。
「佢哋結婚十年，阿田都三十八歲雖然冇話好恨生，但真係有，阿澤都想老婆身體係 ready好。不過因為喺無綫有咁多機會，所以佢想再衝吓！但自從田媽過身，佢睇法又唔同咗，仲同老公商量過拍完手頭啲劇，會減產爭取多啲時間休息，就算造人唔成功，調理好身體都要。」知情者說。
患難見真情
共富貴易，共患難一樣 OK嘅，田蕊妮都算頭幾位！
早年的杜汶澤經常周身債，往後就算憑《無間道》傻強上位，但一朝得志，語無倫次！
事業打回原形！ 12年杜汶澤更發現雙眼出現重影，四肢麻痺，其後證實患上罕見疾病「米勒費雪症候群」，此病嚴重會全身癱瘓，甚至窒息死亡。阿澤即時停工，專心抗病，休息手停口停，田蕊妮擔起頭家，中港兩邊飛搵錢，對老公不離不棄。
撰文、攝影、攝錄：娛樂組
|
鍾意就快D Share啦！
|
|
|