大陸影星楊冪同劉愷威自從去年底忽然傳出楊冪同李易峰拍戲撻着，繼而傳婚姻出危機，二人已冇一齊出席過活動，更屢傳婚變，但係兩公婆都多次發聲明例牌回應否認傳聞，之不過老竇劉丹早前講過囝囝劉愷威同新抱楊冪會喺父親節回港，一家團聚慶祝父親節，話晒楊冪同劉愷威一直忙喺大陸拍劇，未知係唔係好耐冇見過愛女「小糯米」。今日有報道喺香港機場，見到楊冪同劉愷威傳婚變後，首次合體現身，原來係劉愷威接楊冪機，戴上口罩嘅楊冪，獨自行出抵港大堂，冇耐劉愷威戴著黑超嚟接楊冪，同記者打完招呼，就急步離開機場，成程兩公婆有啲貌合神離，冇拖手同攬攬。今日係6月1日兒童節，同時係愛女「小糯米」嘅生日，估計兩公婆係一齊返嚟同愛女過生日，不過佢哋咁耐冇一齊現身，相信兩公婆係想以行動力證恩愛。楊冪被問係唔係返港幫小糯米慶祝，會逗留幾多日?楊冪並冇回答，只係講咗句：「祝大家節日快樂。」咁會唔會夫妻檔參加綜藝節目同最近成日傳佢哋婚變係唔係令佢好厭倦，楊冪都只係答「謝謝」，愷威就話有準備禮物俾小糯米，跟手兩公婆同在場記者講再見，就行咗去停車場，劉愷威為老婆楊冪開車門，自己先再上車，載住楊冪走人。
| (東星娛樂圖片) |  戴上口罩嘅楊冪，獨自行出抵港大堂。(東星娛樂圖片) |  兩公婆成程有啲貌合神離，冇拖手同攬攬。(東星娛樂圖片) |
 估計兩公婆係一齊返嚟同愛女過生日。(東星娛樂圖片) |  二人行到離行離列…(東星娛樂圖片) |  不過上車前，劉愷威都好有風度，為老婆開車門。(東星娛樂圖片) |
來源 source: http://hk.apple.nextmedia.com
|
鍾意就快D Share啦！
|
|
|